జగిత్యాల జూన్ 14 (ప్రజా మంటలు):

(చుక్క గంగారెడ్డి, సీనియర్ జర్నలిస్ట్) 

జగిత్యాల జిల్లా మెట్‌పల్లి తహసీల్దార్ సంతకాన్ని ఫోర్జరీ చేసి, నకిలీ ముద్రలతో తప్పుడు పత్రాలు సృష్టించిన కేసులో రాజుల దేవి నర్సయ్య, కలికోట వేణు, లోలపు గణేష్, పాకాల రాకేష్‌లను మెట్‌పల్లి పోలీసులు ఆదివారం అరెస్ట్ చేశారు.

జగిత్యాల జిల్లా మెట్ పల్లి పట్టణంలోని ఆరపేట వార్డు శివారులోని సర్వే నెం.191 భూమికి నకిలీ ఆబాది సర్టిఫికేట్ తయారు చేసారు. ఆ నకిలీ పత్రాలతో భూమి రిజిస్ట్రేషన్ చేసినట్లు పోలీసులు గుర్తించారు. నిందితుల వద్ద నుంచి కంప్యూటర్ పరికరాలు, రబ్బరు స్టాంపులను స్వాధీనం చేసుకున్నారు. ఈ కేసులో బెజ్జారపు మధుసూదన్, అంగారి శంకర్ పరారీలో ఉన్నట్లు సమాచారం. ప్రభుత్వ పత్రాలను ఫోర్జరీ చేసే వారిపై కఠిన చర్యలు తీసుకుంటామని పోలీసులు హెచ్చరించారు.

ఇబ్రహీంపట్నం, ఫిబ్రవరి 21 (ప్రజా మంటలు-దగ్గుల అశోక్):

ఇబ్రహీంపట్నం మండలం ఎర్దండి గ్రామ శివారులో అనుమానాస్పద స్థితిలో వ్యక్తి మృతి చెందిన ఘటన వెలుగులోకి వచ్చింది. బాశెట్టి గణేష్‌కు చెందిన వ్యవసాయ భూమిలో ఎర్రోళ్ల లింబాద్రి (51), తండ్రి గంగారం, నివాసం మొగిలిపేట (మల్లాపూర్ మండలం) మృతదేహం లభ్యమైంది.

మృతుడి తలకు తీవ్ర గాయాలు ఉండటంతో పాటు రక్తస్రావం జరిగి, బోర్లబొక్కలో పడి మృతి చెందినట్లు పోలీసులు తెలిపారు. సంఘటన స్థలానికి సమీపంలో రోడ్డు పక్కన అతని ద్విచక్ర వాహనం పడిపోయి ఉంది.

పోలీసుల సమాచారం ప్రకారం, లింబాద్రి గత కొన్నేళ్లుగా కుటుంబ కలహాలతో భార్యకు దూరంగా ఉంటున్నాడు. శుక్రవారం రాత్రి సుమారు 8:30 గంటల సమయంలో భార్య, పిల్లలతో గొడవ జరిగినట్లు సమాచారం. ఈ నేపథ్యంలో కుటుంబ వివాద కోణంలో కేసు నమోదు చేసి దర్యాప్తు చేపట్టారు.

ఎర్దండి గ్రామపంచాయతీ కార్యదర్శి ఫిర్యాదు మేరకు కేసు నమోదు కాగా, పోలీసులు సంఘటన స్థలాన్ని పరిశీలించి అన్ని కోణాల్లో విచారణ కొనసాగిస్తున్నారు.

మెట్‌పల్లి, ఫిబ్రవరి 05 (ప్రజా మంటలు):
చేవెళ్ల బార్ అసోసియేషన్ సభ్యురాలు న్యాయవాది స్వప్న హత్యకు పాల్పడిన నిందితులకు వెంటనే కఠిన శిక్ష విధించాలని మెట్‌పల్లి బార్ అసోసియేషన్ అధ్యక్షుడు కంతి మోహన్ రెడ్డి డిమాండ్ చేశారు.

స్వప్న హత్యను నిరసిస్తూ గురువారం మెట్‌పల్లి బార్ అసోసియేషన్ ఆధ్వర్యంలో న్యాయవాదులు విధుల బహిష్కరణకు పిలుపునిచ్చారు. అనంతరం స్వప్నకు మద్దతుగా న్యాయవాదులు నినాదాలు చేశారు. న్యాయవాదులపై దాడులు జరిగితే సహించేది లేదని హెచ్చరించారు.

ఈ కార్యక్రమంలో బార్ అసోసియేషన్ ప్రధాన కార్యదర్శి పసునూరి శ్రీనివాస్, ఉపాధ్యక్షుడు తోగిటి రాజశేఖర్, సంయుక్త కార్యదర్శి గజెల్లి రాందాస్, సాంస్కృతిక కార్యదర్శి మెడిచెల్మల సుమలతతో పాటు పలువురు న్యాయవాదులు పాల్గొన్నారు.