హైదరాబాద్‌, అక్టోబర్ 28:

అంతర్జాతీయ మార్కెట్ ధోరణులను అనుసరించి దేశీయంగానూ బంగారం ధరలు రెండవ రోజు కూడా తగ్గుముఖం పట్టాయి. పెట్టుబడిదారులు లాభాల స్వీకరణకు వెళ్ళడంతో పాటు అమెరికా–చైనా వాణిజ్య ఒప్పందం కుదరొచ్చన్న అంచనాలు పసిడి మార్కెట్‌పై ప్రభావం చూపిస్తున్నాయి.

హైదరాబాద్ బులియన్ మార్కెట్లో మధ్యాహ్నం 12.30 గంటల సమయానికి 10 గ్రాముల స్వచ్ఛమైన పసిడి (24 క్యారెట్లు) ధర ₹1.22 లక్షలుగా నమోదైంది. ఒక్క రోజులో దాదాపు ₹2,000 మేర తగ్గింది. 22 క్యారెట్ల బంగారం ధర ₹1.12 లక్షల వద్ద కొనసాగుతోంది. అంతర్జాతీయ మార్కెట్లో ఔన్సు బంగారం ధర $3,947 వద్ద ట్రేడవుతోంది.

వెండి కూడా ఇదే ధోరణిని అనుసరించింది. అంతర్జాతీయ విపణిలో స్పాట్ సిల్వర్ ధర $46.59 వద్ద ఉండగా, హైదరాబాద్ మార్కెట్లో కిలో వెండి ధర ₹1.48 లక్షలుగా నమోదైంది.

నిపుణుల ప్రకారం, డాలర్ బలపడటం, అమెరికా ట్రెజరీ బాండ్ల రాబడులు పెరగడం పసిడి ధరలపై ఒత్తిడిని పెంచాయి. అయితే దీపావళి తర్వాత పెళ్లి సీజన్ ప్రారంభమవుతుండటంతో ధరలు మళ్లీ కొంత పుంజుకునే అవకాశం ఉందని బులియన్ ట్రేడర్లు అంచనా వేస్తున్నారు.