జగిత్యాల – ఫిబ్రవరి 09 (ప్రజా మంటలు):

చేసిన అభివృద్ధి పనులకే ప్రజలు పట్టం కడతారని, ప్రభుత్వంతో కలిసి పనిచేసే ప్రతినిధులను గెలిపిస్తేనే జగిత్యాల అభివృద్ధి సాధ్యమవుతుందని ఎమ్మెల్యే డా. సంజయ్ కుమార్ అన్నారు. జగిత్యాల పట్టణంలో నిర్వహించిన ప్రచార కార్యక్రమంలో ఆయన మాట్లాడారు.

యావర్ రోడ్డు విస్తరణకు ముఖ్యమంత్రి హామీ ఇచ్చారని, 200 కోట్ల రూపాయలతో యంగ్ ఇండియా ఇంటర్నేషనల్ స్కూల్ నిర్మాణానికి చల్గల్‌లో స్థలం కేటాయించినట్లు తెలిపారు. టీఆర్ నగర్‌ను జగిత్యాలలో విలీనం చేయడం ద్వారా అధిక నిధులు తీసుకొచ్చి అభివృద్ధి చేశామని చెప్పారు.

జగిత్యాల, రాయికల్, టీఆర్ నగర్ ప్రాంతాల్లో తాగునీటి సమస్యకు శాశ్వత పరిష్కారం, సీసీ రోడ్లు, డ్రైనేజీ పనులు చేపట్టినట్లు పేర్కొన్నారు. జగిత్యాలలో అభివృద్ధితో మార్పు మొదలైందని, ప్రజలు దీనిని గమనిస్తున్నారని అన్నారు.

జీవో–58 కింద టీఆర్ నగర్‌లో 116 మందికి ఒక్క రూపాయి ఖర్చు లేకుండా ఇళ్ల పట్టాలు ఇచ్చామని తెలిపారు. అలాగే, 62 కోట్ల నిధులతో జగిత్యాల పట్టణాన్ని మరింత అభివృద్ధి చేస్తామని చెప్పారు. గతంలో ఇతర నియోజకవర్గాల్లో డబుల్ బెడ్‌రూమ్ ఇళ్లు నిర్మాణం జరగలేదని, జగిత్యాలలో మాత్రం రాష్ట్రంలోనే అత్యధికంగా 4520 ఇళ్లు నిర్మించినట్లు తెలిపారు.

కొందరు అభివృద్ధిని ఓర్వలేక కుల, మత, ప్రాంత భేదాలతో ప్రజలను రెచ్చగొట్టే ప్రయత్నం చేస్తున్నారని విమర్శించారు. కన్నీళ్లు, ప్రలోభాలతో ఓట్లు వేయకుండా ప్రజలు అప్రమత్తంగా ఉండాలని సూచించారు. ప్రభుత్వ పక్షాన ఉండి అభివృద్ధి చేసే వారికి ఓటు వేయాలని పిలుపునిచ్చారు.

అర్హులందరికీ ఇందిరమ్మ ఇళ్లు, డబుల్ బెడ్‌రూమ్ ఇళ్లు మంజూరు చేస్తామని, 5 కోట్ల ఎస్‌డీఎఫ్ నిధులతో అన్ని కుల సంఘాల భవనాల అభివృద్ధికి కృషి చేస్తామని తెలిపారు. జగిత్యాల పట్టణంలోని అన్ని వార్డుల్లో నాణ్యతతో అభివృద్ధి పనులు జరుగుతున్నాయని చెప్పారు.

ఒక్క ఓటు ఐదేళ్ల జగిత్యాల అభివృద్ధికి దారితీస్తుందని, ప్రజలు ఆలోచించి నిర్ణయం తీసుకోవాలని కోరారు.ఈ కార్యక్రమంలో వార్డు ప్రజలు, నాయకులు, మహిళలు, యువత పెద్ద సంఖ్యలో పాల్గొన్నారు.

జగిత్యాల. డిసెంబర్ 28, (ప్రజా మంటలు):

ఉపాధ్యాయుల సమస్యలకు త్వరలోనే శాశ్వత పరిష్కారం లభిస్తుందని జగిత్యాల శాసనసభ్యులు డాక్టర్ సంజయ్ కుమార్ భరోసా ఇచ్చారు. టీచర్స్ భవన్‌లో పీఆర్‌టీయూటీఎస్ జగిత్యాల జిల్లా శాఖ ఆధ్వర్యంలో నిర్వహించిన 2026 క్యాలెండర్ ఆవిష్కరణ కార్యక్రమంలో ఆయన ముఖ్య అతిథిగా పాల్గొన్నారు.

ఈ సందర్భంగా ఆయన మాట్లాడుతూ, రాష్ట్ర ముఖ్యమంత్రి రేవంత్ రెడ్డి గారు విద్యాశాఖను స్వయంగా నిర్వహిస్తున్నారని, ప్రభుత్వ పాఠశాలల పరిస్థితులు, ఉపాధ్యాయుల సమస్యలు ఆయనకు పూర్తిగా అవగాహనలో ఉన్నాయని తెలిపారు. ఉపాధ్యాయుల సమస్యలపై సీఎం తరచూ ఉపాధ్యాయ సంఘాల నాయకులు, టీచర్ ఎమ్మెల్సీలతో చర్చిస్తున్నారని అన్నారు. త్వరలోనే ఉపాధ్యాయులకు హెల్త్ కార్డులు మంజూరు చేయనున్నట్లు వెల్లడించారు.

పీఆర్‌టీయూటీఎస్ వంటి సంఘాలు ఉపాధ్యాయుల హక్కుల కోసం నిరంతరం పోరాడుతున్నాయని పేర్కొన్న ఎమ్మెల్యే, టీచర్ ఎమ్మెల్సీ శ్రీపాల్ రెడ్డి కూడా ఉపాధ్యాయ సమస్యలపై ప్రభుత్వంతో నిరంతర సంప్రదింపులు కొనసాగిస్తున్నారని చెప్పారు. ప్రస్తుత ప్రభుత్వం ఏర్పడిన తర్వాత సుమారు 20 వేల మందికి పదోన్నతులు కల్పించామని, టెట్ సమస్యకు కూడా త్వరలో పరిష్కారం లభిస్తుందని హామీ ఇచ్చారు.

ఈ సందర్భంగా సరస్వతి శిశు మందిర్ – వాణి సహకార జూనియర్ కళాశాల వ్యవస్థాపకులు కాసుగంటి సుధాకర్ రావు సేవలను ఎమ్మెల్యే గుర్తు చేశారు. ఆయన విద్యారంగ అభివృద్ధికి, అలాగే గోదావరి వ్యాలీ ద్వారా రైతులకు వ్యవసాయ పనిముట్లు అందించి విశేష సేవలందించారని తెలిపారు. అలాగే ఆయన తాత గారు జగిత్యాల నుంచి రెండుసార్లు ఎమ్మెల్యేగా ఎన్నికై విద్యాభివృద్ధికి కృషి చేశారని గుర్తు చేశారు.

జిల్లా అధ్యక్షులు ఆనంద్ రావు మాట్లాడుతూ, రానున్న విద్యా సంవత్సరంలో మండలానికి ఒక పాఠశాలలో నూతన విద్యా విధానం (NEP–2020) అమలు చేయనున్నట్లు తెలిపారు. ప్రతి విద్యా సంవత్సర ఆరంభంలోనే ఉపాధ్యాయ బదిలీలు, పదోన్నతులు పూర్తిచేయడం ద్వారా జీరో స్కూల్స్ సమస్యను నివారించవచ్చని సూచించారు.

జిల్లా ప్రధాన కార్యదర్శి అమర్నాథ్ రెడ్డి మాట్లాడుతూ, ఉపాధ్యాయుల బిల్లులు, పీఆర్‌సీ, డీఏ వంటి అంశాలు ఇంకా పెండింగ్‌లో ఉన్నాయని, వీటిని రాష్ట్ర ప్రభుత్వం తక్షణమే పరిష్కరించాలని కోరారు.

ఈ కార్యక్రమంలో 2026 టేబుల్, వాల్ క్యాలెండర్లను ఆవిష్కరించారు. అలాగే ఇటీవల మృతి చెందిన కాసుగంటి సుధాకర్ రావుకు ఘన నివాళులర్పిస్తూ రెండు నిమిషాల మౌనం పాటించారు. కార్యక్రమంలో సుమారు 300 మంది ఉపాధ్యాయులు పాల్గొన్నారు. పంచాయతీరాజ్ ఉపాధ్యాయ సంఘం మాసపత్రిక సభ్యులు అబ్దుల్ జమీల్, రాష్ట్ర అసోసియేట్ అధ్యక్షులు జమున తదితరులు పాల్గొన్నారు.

SEO Tags / Keywords:
,