జగిత్యాల, సెప్టెంబర్ 2 (ప్రజామంటలు):

జగిత్యాల జిల్లా బీజేపీలో చాలాకాలంగా అంతర్గతంగా కొనసాగుతున్న విభేదాలు ఇప్పుడు బహిరంగ రాజకీయ పోరుగా మారుతున్న సంకేతాలు కనిపిస్తున్నాయి. నిజామాబాద్ ఎంపీ ధర్మపురి అర్వింద్ వ్యవహారశైలిపై కొందరు సీనియర్ నాయకులు, కార్యకర్తలు అసంతృప్తి వ్యక్తం చేస్తూ ఇటీవల రహస్య సమావేశం నిర్వహించినట్లు ప్రచారం జరుగుతోంది. జగిత్యాల, కోరుట్ల నియోజకవర్గాలకు చెందిన పలువురు నాయకులు సమావేశంలో పాల్గొన్నట్లు పలు కథనాలు వెలువడ్డాయి.
ఈ విభేదాలకు ప్రధానంగా రెండు కోణాలు కనిపిస్తున్నాయి. ఒకటి పార్టీ కోసం ఏళ్లుగా పనిచేస్తున్న పాత నాయకులు, కార్యకర్తలకు తగిన ప్రాధాన్యం దక్కడం లేదనే అసంతృప్తి. రెండోది ఇటీవల పార్టీలోకి వచ్చిన నాయకులకు అధిక ప్రాధాన్యం ఇస్తున్నారనే ఆరోపణ. ముఖ్యంగా బోగ శ్రావణికి ఎంపీ అర్వింద్ ఇచ్చిన ప్రాధాన్యం ఈ అసంతృప్తికి కొత్త కారణంగా మారినట్లు తెలుస్తోంది.

బోగ శ్రావణి వ్యవహారం.. వివాదానికి కేంద్రబిందువా?

 మాజీ మున్సిపల్ చైర్‌పర్సన్ బోగ శ్రావణి బీఆర్‌ఎస్ నుంచి బీజేపీలో చేరి గత అసెంబ్లీ ఎన్నికల్లో జగిత్యాల నుంచి పోటీ చేశారు. ఇటీవల రక్షాబంధన్ సందర్భంగా ఆమె ఎంపీ అర్వింద్‌కు రాఖీ కట్టడం, అనంతరం అర్వింద్ తన తండ్రి ఉపయోగించిన కారును ఆమెకు బహుమతిగా ఇవ్వడం రాజకీయ చర్చకు దారితీసింది.
ఈ వ్యవహారంపై విమర్శలు రావడంతో అర్వింద్ స్వయంగా వివరణ ఇచ్చారు. శ్రావణి పార్టీ కోసం పదవిని వదులుకుని బీజేపీలోకి వచ్చారని, ఆమెను భవిష్యత్ నాయకురాలిగా భావిస్తున్నానని, తండ్రి ఉపయోగించిన సెకండ్‌హ్యాండ్ కారును ఆశీర్వాదంగా ఇచ్చానని ఆయన చెప్పినట్లు వార్తలు వచ్చాయి.
అయితే రాజకీయంగా చూస్తే అసలు ప్రశ్న కారు విలువ ఎంత అన్నది మాత్రమే కాదు. పార్టీలో ఏళ్లుగా పనిచేస్తున్న కార్యకర్తలకు అందుతున్న ప్రాధాన్యంతో పోలిస్తే కొత్తగా వచ్చిన నాయకురాలికి లభిస్తున్న రాజకీయ ప్రాధాన్యం ఎంత? అన్నదే అసంతృప్తి వర్గం ప్రధానంగా లేవనెత్తుతున్న ప్రశ్నగా కనిపిస్తోంది.

పాత నాయకులు వర్సెస్ కొత్త నాయకత్వం

జగిత్యాల బీజేపీలోని ప్రస్తుత పరిణామాలను కేవలం వ్యక్తుల మధ్య విభేదాలుగా చూడటం సరిపోదు. పార్టీ విస్తరణ సమయంలో బలమైన స్థానిక నాయకత్వాన్ని నిర్మించాలా? లేక ఎన్నికల్లో గెలిచే సామర్థ్యం ఉన్న కొత్త ముఖాలను ముందుకు తీసుకురావాలా? అనే వ్యూహాత్మక ప్రశ్న కూడా ఇందులో ఉంది.
పాత నాయకుల వాదన ప్రకారం పార్టీ కోసం సంవత్సరాలుగా పనిచేసిన తమను పక్కనపెట్టి కొత్తగా వచ్చిన వారికి అధిక ప్రాధాన్యం ఇస్తున్నారు. మరోవైపు కొత్త నాయకత్వానికి అనుకూలంగా ఉన్న వర్గం మాత్రం ఎన్నికల్లో పార్టీ బలపడాలంటే ప్రజల్లో గుర్తింపు ఉన్న, సామాజికంగా ప్రభావం చూపగల నాయకులను ముందుకు తీసుకురావడం అవసరమని భావిస్తున్నట్లు తెలుస్తోంది.
ఇదే విభేదం ఇప్పుడు వ్యక్తిగత అసంతృప్తి నుంచి సంస్థాగత పోరుగా మారే ప్రమాదం కనిపిస్తోంది.

అరవింద్–బండి సంజయ్ అంశం

జగిత్యాల పరిణామాల్లో మరో ముఖ్యమైన అంశం బీజేపీ ఎంపీలు ధర్మపురి అర్వింద్, బండి సంజయ్ మధ్య ఉన్న రాజకీయ సమీకరణాలు. ఇద్దరూ ఉత్తర తెలంగాణలో ప్రభావం ఉన్న నాయకులు కావడంతో స్థానిక రాజకీయాల్లో వారి అనుచర వర్గాల ప్రభావం కూడా చర్చకు వస్తోంది.
అయితే ఇద్దరి మధ్య వ్యక్తిగత విభేదాలపై వస్తున్న అనేక ఆరోపణలను నిర్ధారిత వాస్తవాలుగా కాకుండా పార్టీ అంతర్గత రాజకీయాల్లో వినిపిస్తున్న వాదనలు, ఆరోపణలుగానే చూడాలి. అర్వింద్‌కు వ్యతిరేకంగా ఉన్న వర్గాలను ఒకచోట చేర్చడంలో బండి సంజయ్ వర్గానికి చెందిన నాయకుల పాత్ర ఉందనే ప్రచారం కూడా వినిపిస్తోంది. దీనిపై అధికారికంగా స్పష్టమైన నిర్ధారణ మాత్రం అవసరం.

500 కార్లతో హైదరాబాద్‌కు తరలివెళ్లనున్నారా?

అరవింద్‌పై అసంతృప్తితో ఉన్న నాయకులకు దీటుగా,  అరవింద్ వర్గం  కార్యకర్తలు పార్టీ రాష్ట్ర అధ్యక్షుడు రామచందర్‌రావును కలిసి ఫిర్యాదు చేసేందుకు సిద్ధమవుతున్నారనే సమాచారం రాజకీయ వర్గాల్లో చర్చనీయాంశమైంది. నిజామాబాద్ పార్లమెంట్ పరిధిలోని ఏడు అసెంబ్లీ నియోజకవర్గాల నుంచి పెద్ద సంఖ్యలో కార్యకర్తలను సమీకరించాలనే ప్రయత్నం జరుగుతున్నట్లు సమాచారం.
జగిత్యాల నియోజకవర్గం నుంచి కూడా పెద్ద సంఖ్యలో వాహనాలతో హైదరాబాద్‌కు వెళ్లి రాష్ట్ర నాయకత్వానికి తమ అభ్యంతరాలను వివరించనున్నారనే ప్రచారం ఉంది. ఇది నిజంగా కార్యరూపం దాల్చితే, వివాదం ఇక జిల్లా స్థాయి సమస్యగా కాకుండా రాష్ట్ర బీజేపీ నాయకత్వం ముందున్న సమస్యగా మారుతుంది.

బీజేపీకి అసలు సవాలు ఇదే

జగిత్యాల బీజేపీలో ప్రస్తుత పరిణామాలను ఒక వ్యక్తికి అనుకూలం, మరో వ్యక్తికి వ్యతిరేకం అనే కోణంలో మాత్రమే చూస్తే అసలు సమస్య కనిపించదు. పార్టీకి బలమైన ఓటు ఆధారం ఏర్పడుతున్న సమయంలో నాయకత్వం మధ్య విభేదాలు పెరగడం బీజేపీకి రాజకీయంగా నష్టం కలిగించే అవకాశం ఉంది.
ప్రత్యేకంగా వచ్చే ఎన్నికల నాటికి జగిత్యాల నియోజకవర్గంలో బీజేపీ ప్రధాన పోటీదారుగా ఎదగాలంటే పాత కార్యకర్తల అనుభవం, కొత్త నాయకత్వం ప్రజాదరణ, సామాజిక సమీకరణాలు, స్థానిక నాయకుల సమన్వయం అన్నీ కలిసి పనిచేయాల్సి ఉంటుంది.
ఒక వర్గాన్ని పూర్తిగా పక్కనపెట్టి మరో వర్గాన్ని బలోపేతం చేయడం పార్టీని ఎన్నికల సమయంలో బలహీనపరిచే ప్రమాదం ఉంది. అదే సమయంలో ఎన్నికల్లో బలమైన కొత్త ముఖాలను ముందుకు తీసుకురావడాన్ని పాత నాయకత్వం అడ్డుకోవడం కూడా పార్టీ విస్తరణకు సమస్యే.

అంతిమంగా.. ఇది కారు వివాదం మాత్రమే కాదు

బోగ శ్రావణికి కారు బహుమతి వ్యవహారం ప్రస్తుతం కనిపిస్తున్న వివాదానికి తక్షణ కారణం కావచ్చు. కానీ దాని వెనుక చాలా కాలంగా పేరుకుపోయిన నాయకత్వ అసంతృప్తి, ప్రాధాన్యతలపై వివాదం, స్థానిక వర్గపోరు, భవిష్యత్ అభ్యర్థిత్వాలపై ముందస్తు సమీకరణాలు వంటి అంశాలు ఉన్నాయనే రాజకీయ విశ్లేషణలు వినిపిస్తున్నాయి.
అందుకే జగిత్యాల బీజేపీ సమస్యకు పరిష్కారం వ్యక్తుల మధ్య రాజీతో మాత్రమే సాధ్యం కాదు. పార్టీలో ప్రతి వర్గానికి ప్రాతినిధ్యం, కార్యకర్తలకు గౌరవం, నాయకత్వంపై స్పష్టత, అభ్యర్థిత్వాలపై పారదర్శక విధానం, స్థానిక సమస్యలపై సమిష్టి పోరాటం అవసరం.
లేకపోతే ప్రస్తుతం ఫామ్‌హౌస్‌లో జరిగిన సమావేశం రేపటి రోజున బహిరంగ తిరుగుబాటుగా మారే ప్రమాదం ఉంది. రాష్ట్ర నాయకత్వం ఈ విభేదాలను ఎంత త్వరగా పరిష్కరిస్తుందన్నదే జగిత్యాల బీజేపీ భవిష్యత్ రాజకీయ దిశను నిర్ణయించనుంది.

కరీంనగర్  ఫిబ్రవరి 16 (ప్రజా మంటలు):

కరీంనగర్ మున్సిపల్ కార్పొరేషన్ మేయర్ పీఠం విషయంలో కొనసాగుతున్న ఉత్కంఠకు చివరి నిమిషంలో కీలక మలుపు చోటుచేసుకుంది. ఇటీవల జరిగిన కార్పొరేషన్ ఎన్నికల్లో ఏ పార్టీకి స్పష్టమైన మెజారిటీ రాకపోవడంతో, మేయర్ పీఠం ఎవరికి దక్కుతుందనే అంశం రాష్ట్రవ్యాప్తంగా చర్చనీయాంశంగా మారింది.

మొత్తం 66 డివిజన్లలో

• భారతీయ జనతా పార్టీ (బీజేపీ) – 30 స్థానాలు,
• కాంగ్రెస్ – 14,
• భారత రాష్ట్ర సమితి (బీఆర్ఎస్) – 9,
• స్వతంత్రులు – 8,
• AIMIM – 3,
• ఆల్ ఇండియా ఫార్వర్డ్ బ్లాక్ – 2
  స్థానాలు గెలుచుకున్నాయి.

ఈ నేపథ్యంలో స్వతంత్ర కార్పొరేటర్ల మద్దతుతో మేయర్ పీఠాన్ని కైవసం చేసుకోవాలని బీజేపీ వ్యూహాలు రచించింది. అయితే ఫార్వర్డ్ బ్లాక్ నుంచి గెలిచిన సాయి జ్యోతి ఓటు ఎవరికి పడుతుందన్న అంశం రాజకీయంగా కీలకంగా మారింది.

ఈ క్రమంలో మంత్రి పొన్నం ప్రభాకర్ స్పందిస్తూ, “కరీంనగర్ మేయర్ పీఠం పోటీలో కాంగ్రెస్ కూడా చివరి వరకు ప్రయత్నం చేస్తుంది” అని ప్రకటించారు. దీంతో బీజేపీకి చెక్ పెట్టేందుకు కాంగ్రెస్, బీఆర్ఎస్, ఎంఐఎం కలిసి పోటీకి దిగుతాయన్న వార్తలు ఊపందుకున్నాయి.

అయితే, చివరి నిమిషంలో బీఆర్ఎస్ ఎవరూ ఊహించని నిర్ణయం తీసుకుంది. మొత్తం 9 కార్పొరేటర్లతో పాటు ఎక్స్ అఫిషియో ఓటుతో కలిపి 10 ఓట్లు ఉన్నప్పటికీ, కరీంనగర్ మేయర్ ఎన్నికకు దూరంగా ఉంటున్నట్లు బీఆర్ఎస్ అధికారికంగా ప్రకటించింది. ఈ నిర్ణయంతో కాంగ్రెస్ వ్యూహాలు ఫలించకుండా పోయాయి.

బీఆర్ఎస్ తప్పుకోవడంతో రాజకీయ ఉత్కంఠకు తెరపడినట్లైంది. 30 కార్పొరేటర్లను గెలుచుకున్న బీజేపీకి, ఇద్దరు స్వతంత్రులు మరియు రెండు ఎక్స్ అఫిషియో ఓట్ల మద్దతుతో కలిపి మొత్తం 34 సభ్యుల బలం లభించింది. దీంతో మేయర్ పీఠం దక్కించుకునేందుకు అవసరమైన మెజారిటీ బీజేపీకి సమకూరింది.

ఈ పరిణామంతో తెలంగాణ చరిత్రలో తొలిసారి బీజేపీ కరీంనగర్ మేయర్ పీఠాన్ని కైవసం చేసుకునే అవకాశం స్పష్టమైంది. కేంద్ర మంత్రి బండి సంజయ్ వర్గంలో, అలాగే కాషాయ పార్టీ శ్రేణుల్లో ఉత్సాహం వెల్లివిరిసింది.

అయితే రాజకీయాల్లో చివరి నిమిషం వరకు మార్పులు చోటుచేసుకునే అవకాశాన్ని కొట్టిపారేయలేమని విశ్లేషకులు అంటున్నారు. కరీంనగర్ మేయర్ పీఠం నిజంగా బీజేపీకే దక్కుతుందా? లేదా చివరి క్షణంలో కొత్త సమీకరణలు తెరపైకి వస్తాయా? అన్నది ఈ రోజు సాయంత్రం వరకు వేచి చూడాల్సిందే..

కరీంనగర్, డిసెంబర్ 24 (ప్రజా మంటలు):

తెలంగాణ గ్రామ పంచాయతీలకు నిధుల విడుదల విషయంలో కేంద్రమంత్రి బండి సంజయ్ కాంగ్రెస్ ప్రభుత్వంపై తీవ్ర విమర్శలు చేశారు. నెల రోజుల్లోగా పంచాయతీలకు నిధులు విడుదల చేయాలని డెడ్‌లైన్ విధిస్తూ, లేకపోతే హైదరాబాద్ నడిబొడ్డున రాష్ట్రవ్యాప్త సర్పంచులు, ఉప సర్పంచులతో భారీ “పరేడ్” నిర్వహిస్తామని హెచ్చరించారు. గ్రామాలకు నిధులు వచ్చే వరకు పోరాటం ఆపేది లేదని స్పష్టం చేశారు.

కరీంనగర్ పార్లమెంట్ పరిధిలో గెలిచిన 108 మంది బీజేపీ మద్దతుదారులైన సర్పంచులు, ఉప సర్పంచులు, వార్డు సభ్యులను సన్మానించిన బండి సంజయ్, ఈ 108 గ్రామాలను ఆదర్శంగా అభివృద్ధి చేస్తానని హామీ ఇచ్చారు. ప్రతి గ్రామంలో వాటర్ ప్లాంట్, ప్రభుత్వ పాఠశాలల్లో టాయిలెట్లు, ప్రాథమిక ఆరోగ్య కేంద్రాలకు అవసరమైన వైద్య పరికరాలు అందిస్తానన్నారు. విద్య, వైద్య రంగాలకు ప్రథమ ప్రాధాన్యత ఇస్తానని, 9వ తరగతి విద్యార్థులకు సర్పంచుల ఆధ్వర్యంలో సైకిళ్లు పంపిణీ చేస్తామని తెలిపారు.

సర్పంచ్ పదవి అధికారం కాదని, ప్రజల బాధ్యత అని పేర్కొన్న ఆయన, ప్రజలకు కష్టకాలంలో తండ్రిలా ఆదుకునే నాయకత్వం చూపాలని కొత్తగా ఎన్నికైన ప్రజాప్రతినిధులకు సూచించారు.