హైదరాబాద్, ఏప్రిల్ 22 (ప్రజా మంటలు):

‘పరమపద సోపానం’ సినిమా ప్రీ రిలీజ్ ఈవెంట్ హైదరాబాద్‌లో ఘనంగా జరిగింది. అర్జున్ అంబటి హీరోగా, జెన్నిఫర్ ఇమ్మాన్యుయేల్ హీరోయిన్‌గా నటించిన ఈ చిత్రాన్ని గణపర్తి నారాయణరావు నిర్మించగా, నాగ శివ దర్శకత్వం వహించారు. ఈ సినిమా ఏప్రిల్ 24న ప్రేక్షకుల ముందుకు రానుంది.

ఈ కార్యక్రమానికి ప్రముఖ దర్శకులు భీమనేని శ్రీనివాసరావు, సముద్ర, వీర శంకర్ ముఖ్య అతిథులుగా హాజరయ్యారు.

భీమనేని శ్రీనివాసరావు మాట్లాడుతూ ఈ చిత్రం ఘనవిజయం సాధించాలని ఆకాంక్షించారు. కొత్తవారికి మంచి అవకాశం కలిగే సినిమా అవుతుందని పేర్కొన్నారు.

సముద్ర మాట్లాడుతూ అచ్చ తెలుగు టైటిల్‌తో వస్తున్న ఈ సినిమా పెద్ద హిట్ అవుతుందని నమ్మకం వ్యక్తం చేశారు.
వీర శంకర్ మాట్లాడుతూ దర్శకుడు నాగ శివ కష్టపడి సినిమాను ఈ స్థాయికి తీసుకువచ్చారని, ప్రేక్షకులు ఆదరించాలని కోరారు.

హీరో అర్జున్ అంబటి మాట్లాడుతూ ప్రముఖ దర్శకులు తన సినిమాకు రావడం ఆనందంగా ఉందని చెప్పారు. ఈ చిత్రం థ్రిల్లర్‌గా ప్రేక్షకులను ఆకట్టుకుంటుందని తెలిపారు.
హీరోయిన్ జెన్నిఫర్ ఇమ్మాన్యుయేల్ తన పాత్ర ప్రత్యేకంగా ఉంటుందని, ప్రేక్షకులు తప్పకుండా ఆదరిస్తారని ఆశాభావం వ్యక్తం చేశారు.

దర్శకుడు నాగ శివ మాట్లాడుతూ ఎన్నో కష్టాలను ఎదుర్కొని ఈ సినిమాను పూర్తి చేశామని, అందరి సహకారం వల్లే ఇది సాధ్యమైందని చెప్పారు. ప్రేక్షకులు తప్పకుండా సపోర్ట్ చేయాలని కోరారు.

సంగీత దర్శకుడు దేవ్ జాండ్, డీఓపీ ఈశ్వర్, రచయిత రాంబాబు గోసాల తదితరులు కూడా సినిమా విజయం సాధించాలని ఆకాంక్షించారు.

చిత్ర విశేషాలు:

* హీరో: అర్జున్ అంబటి
* హీరోయిన్: జెన్నిఫర్ ఇమ్మాన్యుయేల్
* దర్శకుడు: నాగ శివ
* నిర్మాత: గణపర్తి నారాయణరావు
* సంగీతం: దేవ్ జాండ్
* సినిమాటోగ్రఫీ: ఈశ్వర్
* నిర్మాణ సంస్థ: స్వయంభూ క్రియేషన్స్

విడుదల తేదీ: ఏప్రిల్ 24, 2026

థ్రిల్లర్ జానర్‌లో తెరకెక్కిన ‘పరమపద సోపానం’పై చిత్రబృందం భారీ అంచనాలు పెట్టుకుంది. ప్రేక్షకులు ఎంతవరకు ఆదరిస్తారో చూడాలి.

ప్రఖ్యాత బాలీవుడ్ గాయని Asha Bhosle (92) కన్నుమూశారు. గుండెపోటుతో ముంబైలోని ఆసుపత్రిలో చికిత్స పొందుతూ ఆమె మరణించినట్లు కుటుంబ సభ్యులు ధృవీకరించారు. ఆమె మరణంతో భారతీయ సినీ సంగీతంలో ఒక మహా యుగానికి ముగింపు పలికినట్టైంది.

ఎనిమిది దశాబ్దాల పాటు సాగిన ఆమె సంగీత ప్రయాణంలో 12,000కు పైగా పాటలు పాడి కోట్లాది అభిమానుల హృదయాల్లో చెరగని ముద్ర వేశారు. రొమాంటిక్ గీతాల నుంచి ఫాస్ట్ బీట్ పాటల వరకు అన్ని శైలుల్లో ఆమె గాత్రం ప్రత్యేక గుర్తింపు పొందింది.
భారత ప్రధాని Narendra Modi ఆమె మరణంపై సంతాపం వ్యక్తం చేస్తూ “భారతదేశం చూసిన అత్యంత ప్రతిభావంతమైన గాత్రాలలో ఒకటి” అని అభివర్ణించారు. నటి Hema Malini, సంగీత దర్శకుడు Shankar Mahadevan వంటి ప్రముఖులు కూడా తమ సంతాపాన్ని వ్యక్తం చేశారు.
1933 సెప్టెంబర్ 8న మహారాష్ట్రలో జన్మించిన ఆశా భోస్లే, చిన్న వయసులోనే సంగీత ప్రయాణం ప్రారంభించారు. ఆమె తండ్రి దీననాథ్ మంగేష్కర్ ప్రభావంతో సంగీతంపై ఆసక్తి పెంచుకున్నారు. 1943లో తొలి పాట పాడిన ఆమె, 1950-60 దశకాల్లో బాలీవుడ్‌లో అగ్రగాయని స్థాయికి చేరుకున్నారు.
సంగీత దర్శకుడు R. D. Burman తో ఆమె కలయిక బాలీవుడ్ చరిత్రలో అత్యంత విజయవంతమైన కాంబినేషన్‌గా నిలిచింది. “దమ్ మారో దమ్”, “పియా తు అబ్ తో ఆజా”, “మేహంది హై రచ్నేవాలి” వంటి పాటలు ఆమె కెరీర్‌లో మైలురాళ్లుగా నిలిచాయి.
తన అక్క Lata Mangeshkar తో పోలికలు వచ్చినా, ఆశా భోస్లే తనదైన శైలిలో ప్రత్యేక గుర్తింపు తెచ్చుకున్నారు. గజల్స్, భజన్స్, పాప్, కవ్వాలీ వంటి పలు సంగీత ప్రక్రియల్లో ఆమె తన ప్రతిభను చాటుకున్నారు.
ఆమె మరణ వార్తతో సోషల్ మీడియాలో అభిమానులు, సినీ ప్రముఖులు సంతాప సందేశాలు వెల్లువెత్తుతున్నాయి. ఆమె గాత్రం ఎప్పటికీ నిలిచిపోతుందని అభిమానులు భావోద్వేగంగా గుర్తుచేసుకుంటున్నారు.

జగిత్యాల ఫిబ్రవరి 16 (ప్రజా మంటలు)

జగిత్యాల పట్టణంలో సినీ హీరో అర్జున్ సందడి చేశారు. స్థానిక శ్రీనివాస థియేటర్లో అర్జున్ మరియు ఆయన కుమార్తె ఐశ్వర్య అర్జున్ నటించిన సీతా పయనం చిత్రం ప్రదర్శింపబడుతున్న సందర్భంగా, మ్యాట్నీ షో సమయంలో థియేటర్‌ను సందర్శించి ప్రేక్షకులతో కలిసి సినిమాను వీక్షించారు.

ఈ సందర్భంగా అర్జున్ మాట్లాడుతూ, “నేను నా కుమార్తె నటించిన ‘సీతా పయనం’ చిత్రాన్ని అందరూ చూసి ఆదరించాలి” అని కోరారు. హీరో అర్జున్‌తో ఫోటోలు దిగేందుకు అభిమానులు పోటీ పడ్డారు. థియేటర్‌లో కొద్దిసేపు ఉత్సాహభరిత వాతావరణం నెలకొంది.

ఈ కార్యక్రమంలో థియేటర్ మేనేజర్ జీవన్, కళాశ్రీ అధినేత గుండేటి రాజు, గంగాధర్ తదితరులు హీరో అర్జున్‌ను ఘనంగా సన్మానించారు.

చెన్నై ఫిబ్రవరి 13:

థ్రిల్లర్ నేపథ్యంలో రూపొందిన కొత్త వెబ్ సిరీస్ రోస్లిన్ ట్రైలర్ విడుదలైంది. ఈ సిరీస్‌కు ప్రముఖ దర్శకుడు జితు జోసెఫ్ షోరన్నర్‌గా వ్యవహరిస్తున్నారు.

సిరీస్‌కు సుమేష్ నందకుమార్ దర్శకత్వం వహించగా, కథను వినాయక్ శశికుమార్ రచించారు. మాథ్యూ జార్జ్ ఈ సిరీస్‌ను నిర్మించారు.

ఈ సిరీస్‌లో ప్రముఖ నటి మీనా ప్రధాన పాత్రలో నటిస్తున్నారు. ఆమెతో పాటు సంజన తిబు, వినీత్, హకీమ్ షా తదితరులు కీలక పాత్రలు పోషిస్తున్నారు.

‘రోస్లిన్’ వెబ్ సిరీస్ ఫిబ్రవరి 27 నుంచి జియో హాట్‌స్టార్ OTT వేదికపై ప్రసారం కానుంది. మలయాళం, హిందీ, తమిళం, తెలుగు, కన్నడ, బెంగాలీ తదితర భాషల్లో ఈ సిరీస్ విడుదల కానుంది.

చెన్నై – ఫిబ్రవరి 09 (ప్రజా మంటలు):

TVK పార్టీ నాయకుడు దలపతి నటించిన ‘జననాయకన్’ చిత్రాన్ని మళ్లీ సెన్సార్ బోర్డుకు పంపాలని చిత్ర నిర్మాతలు నిర్ణయించారు. ఈ నిర్ణయంతో సంబంధించి కోర్టులో పెండింగ్‌లో ఉన్న కేసును చిత్ర బృందం ఉపసంహరించుకున్నట్లు న్యాయస్థానానికి తెలియజేసింది.

ఇంతవరకు ఉన్న ఈ చిత్ర సెన్సార్ పై ఉన్న సందేహాలను ప్రక్కన పెట్టీ, సమస్యను పరిష్కరించుకునే విధంగా, చిత్ర నిర్మాణ బృందం చిత్రం సెన్సార్ కు మళ్లీ దరఖాస్తు చేయనున్నట్లు తెలుస్తుంది. 

ఈ కేసును విచారించిన న్యాయమూర్తి పి.డి. ఆశా, ‘జననాయకన్’ చిత్రాన్ని సమీక్ష కమిటీ ముందు ప్రదర్శించాలని సిఫార్సు చేసిన సెన్సార్ బోర్డు చైర్మన్ ఆదేశాలను రద్దు చేశారు. అలాగే చిత్రానికి వెంటనే సెన్సార్ సర్టిఫికెట్ ఇవ్వాలని ప్రత్యేక న్యాయమూర్తి ఆదేశాలు జారీ చేశారు.

అయితే, ప్రత్యేక న్యాయమూర్తి ఉత్తర్వులను సవాలు చేస్తూ సెంట్రల్ బోర్డ్ ఆఫ్ ఫిల్మ్ సెన్సార్‌షిప్ (CBFC) అప్పీల్ దాఖలు చేసింది. ఈ అప్పీల్‌ను విచారించిన ప్రధాన న్యాయమూర్తి నేతృత్వంలోని ధర్మాసనం, ‘జననాయకన్’ చిత్రానికి సెన్సార్ సర్టిఫికెట్ మంజూరు చేయాలని ఇచ్చిన ప్రత్యేక న్యాయమూర్తి ఉత్తర్వులపై మధ్యంతర స్టే విధించింది.

జగిత్యాల రూరల్, ఫిబ్రవరి 07 (ప్రజా మంటలు):

జగిత్యాల జిల్లా సారంగాపూర్ మండలంలోని అటవీ ప్రాంతం శనివారం రోజంతా ఫోక్ పాట చిత్రీకరణతో కళకళలాడింది. స్థానిక ప్రజల జీవనశైలిని, గ్రామీణ భావోద్వేగాలను ప్రతిబింబించే ‘కడదాకా తోడుంటనే’ అనే ఫోక్ సాంగ్ షూటింగ్ భారీ ఆసక్తి నడుమ సాగింది.

ఈ పాటను బొమ్మరిల్లు ఫోక్స్ యూట్యూబ్ ఛానల్ ఆధ్వర్యంలో రూపొందిస్తుండగా, ఛానల్ నిర్వాహకులు వేణు, గంగాధర్ పర్యవేక్షణలో చిత్రీకరణ జరిగింది. గ్రామీణ నేపథ్యానికి తగ్గట్టుగా సహజమైన లొకేషన్లలో షూటింగ్ నిర్వహించడంతో సారంగాపూర్ ఫారెస్ట్ ప్రాంతం సందడిగా మారింది.

ఈ ఫోక్ సాంగ్‌కు డైరెక్టర్ రాజ్ నరేందర్ దర్శకత్వం వహిస్తుండగా,
హరిష్ పటేల్ సినిమాటోగ్రఫీ బాధ్యతలు నిర్వర్తించారు.
గ్రామీణ భావోద్వేగాలను హృదయానికి హత్తుకునేలా తెరకెక్కిస్తున్న ఈ పాటలో
సోని వైష్ణవి, ఈశ్వర్ సాయి ప్రధాన తారలుగా నటిస్తున్నారు.

వారి నటన, సహజ హావభావాలు పాటకు ప్రత్యేక ఆకర్షణగా నిలుస్తున్నాయని అక్కడికి చేరుకున్న ప్రేక్షకులు అభిప్రాయపడ్డారు.

గ్రామ ప్రజల భారీ హాజరు

పాట చిత్రీకరణ జరుగుతోందన్న విషయం తెలియడంతో చుట్టుపక్కల గ్రామాల నుంచి ప్రజలు భారీ సంఖ్యలో తరలివచ్చారు. షూటింగ్‌ను ప్రత్యక్షంగా చూడడానికి యువతతో పాటు మహిళలు, పెద్దలు ఆసక్తి చూపించారు. ఫోక్ సంస్కృతి, స్థానిక కళలకు ప్రాధాన్యం ఇస్తూ రూపొందుతున్న ఈ పాటపై గ్రామస్థులు హర్షం వ్యక్తం చేశారు.

ఈ చిత్రీకరణ కార్యక్రమంలో
కళాశ్రీ అధినేత గుండేటి రాజు,
హేమారెడ్డి, శ్రీకాంత్, హరి ప్రసాద్,
మానాల నటరాజు తదితరులు పాల్గొని చిత్ర బృందాన్ని ప్రోత్సహించారు.
వారు మాట్లాడుతూ, గ్రామీణ కళలు, ఫోక్ పాటలు యువతకు చేరువయ్యేలా ఇలాంటి ప్రయత్నాలు మరిన్ని జరగాలని ఆకాంక్షించారు.

గ్రామీణ సంస్కృతికి ప్రతీకగా నిలిచే ఈ ఫోక్ సాంగ్ విడుదల కోసం ప్రేక్షకులు ఆసక్తిగా ఎదురుచూస్తుండగా, ‘కడదాకా తోడుంటనే’ పాట బొమ్మరిల్లు ఫోక్స్ ఛానల్‌కు మరో గుర్తింపు తెస్తుందనే ఆశాభావం వ్యక్తమవుతోంది.

3. ప్రధాన కళాకారులు & ఇతర నామినేషన్లు

హైదరాబాద్, జనవరి 24:

శ్రీ సాయి శివ ప్రియ క్రియేషన్స్ పతాకంపై పురిపండ వి. వెంకటరమణ మూర్తి శర్మ నిర్మాతగా, విజయమిత్ర దర్శకత్వంలో రూపొందుతున్న చిత్రం ‘100 డేస్ లవ్ స్టోరీ’. ‘అతి ప్రేమ భయానకం’ అనే క్యాప్షన్‌తో తెరకెక్కుతున్న ఈ చిత్రానికి సంబంధించిన ట్రైలర్‌ను శుక్రవారం ప్రసాద్ ల్యాబ్‌లో ఘనంగా విడుదల చేశారు. ఈ కార్యక్రమంలో ట్రైలర్‌ను నిర్మాత సాయి వెంకట్ విడుదల చేశారు.

ఈ సందర్భంగా సాయి వెంకట్ మాట్లాడుతూ, ట్రైలర్ అత్యంత అద్భుతంగా ఉందని, చూసిన వెంటనే ఇది ఓ చక్కటి ప్రేమకథలా అనిపిస్తుందని అన్నారు. ‘అతి ప్రేమ భయానకం’ అనే క్యాప్షన్‌నే చూస్తే సినిమా ఏ స్థాయిలో ఉండబోతోందో అర్థమవుతుందన్నారు. ప్రేమ పేరుతో సమాజంలో జరుగుతున్న మోసాలు, యువత ఎదుర్కొంటున్న సమస్యలను ఈ సినిమా ప్రతిబింబిస్తుందని, యువత జాగ్రత్తగా ఉండాల్సిన అవసరం ఉందని తెలిపారు.

హీరో జయ శివ సూర్య స్పందన

హీరో జయ శివ సూర్య మాట్లాడుతూ, తనను చూసిన వారు పాన్ ఇండియా స్టార్ ప్రభాస్‌లా ఉన్నావని అనడం ఎంతో ఆనందంగా ఉందన్నారు. ప్రభాస్‌తో పోల్చడం తన అదృష్టంగా భావిస్తున్నానని, ఈ సినిమా తనకు హీరోగా మంచి పేరు తెచ్చిపెడుతుందనే నమ్మకం ఉందని చెప్పారు.

దర్శకుడు విజయమిత్ర వ్యాఖ్యలు

ఈ చిత్రానికి కథ, మాటలు, స్క్రీన్‌ప్లే, దర్శకత్వం వహించిన విజయమిత్ర మాట్లాడుతూ—
ప్రస్తుతం టాలీవుడ్‌లో వస్తున్న సినిమాలకు భిన్నంగా ‘100 డేస్ లవ్ స్టోరీ’ రూపొందిందన్నారు. ప్రతి ఫ్రేమ్‌లో అన్ని వర్గాల ప్రేక్షకులను ఆకట్టుకునే అంశాలు ఉంటాయని, సన్నివేశాలు ఆద్యంతం ప్రేక్షకుల మనసులను దోచుకుంటాయని ధీమా వ్యక్తం చేశారు. ఈ సినిమా తనకు, హీరో జయ శివ సూర్యకు, నిర్మాత వెంకటరమణ మూర్తి శర్మకు మంచి పేరు తీసుకువస్తుందని తెలిపారు.

నిర్మాత వెంకటరమణ మూర్తి శర్మ

నిర్మాత పురిపండ వి. వెంకటరమణ మూర్తి శర్మ మాట్లాడుతూ, ఈ చిత్రాన్ని ప్రపంచ వ్యాప్తంగా ఫిబ్రవరి 13న, లవర్స్ డేకు ఒక రోజు ముందే విడుదల చేయడానికి సన్నాహాలు చేస్తున్నట్లు తెలిపారు. ఎక్కడా రాజీ పడకుండా అన్ని వర్గాల ప్రేక్షకులను ఆకట్టుకునేలా చిత్రాన్ని తీర్చిదిద్దామని చెప్పారు.

హీరోయిన్ నిఖిత శ్రీ

హీరోయిన్ నిఖిత శ్రీ మాట్లాడుతూ, ఈ సినిమాలో నటించే అవకాశం ఇచ్చిన దర్శకుడు, నిర్మాతలకు కృతజ్ఞతలు తెలిపారు.

ఇతర నటీనటులు, సాంకేతిక బృందం

ఈ చిత్రంలో మరో హీరోయిన్‌గా ఇషా మనోహరి ప్రియ నటిస్తున్నారు. అలాగే
ఖబర్దస్ట్ అప్పారావు, ఆకెళ్ళ గోపాలకృష్ణ, కుమరన్ శేతురామన్, పి.వి.ఆర్ శర్మ తదితరులు కీలక పాత్రల్లో నటించారు.

సాంకేతిక విభాగం:

• సినిమాటోగ్రఫీ (DOP): శేషు డి. నాయుడు
• సంగీతం: తరుణ్ రాణాప్రతాప్
• ఎడిటింగ్ / SFX: శ్యామ్ కుమార్
• డిజైన్స్, గ్రాఫిక్స్: ఖ్యాతి విజువల్స్
• పీఆర్వో: బాబు నాయక్

న్యూఢిల్లీ, జనవరి 15 (ప్రజా మంటలు):

విజయ్ ప్రధాన పాత్రలో తెరకెక్కిన ‘జన నాయగన్’ సినిమా సర్టిఫికేషన్ అంశానికి సంబంధించి మద్రాస్ హైకోర్టు డివిజన్ బెంచ్ ఇచ్చిన స్టే ఉత్తర్వులను సవాలు చేస్తూ దాఖలైన పిటిషన్‌ను సుప్రీంకోర్టు గురువారం తిరస్కరించింది.

ఈ సినిమా నిర్మాతలు తమపై ఆర్థికంగా తీవ్ర ప్రభావం పడిందని, “తాము పూర్తిగా నష్టపోయాం (ruined)” అంటూ అత్యున్నత న్యాయస్థానాన్ని ఆశ్రయించారు. అయితే ఈ వ్యవహారంలో తాము జోక్యం చేసుకోబోమని స్పష్టం చేసిన సుప్రీంకోర్టు, జనవరి 20న మద్రాస్ హైకోర్టు డివిజన్ బెంచ్ తగిన దిశానిర్దేశాలు జారీ చేయాలని ఆదేశించింది.

సినిమా సర్టిఫికేషన్ విషయంలో సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) నిర్ణయంపై హైకోర్టులో వివాదం కొనసాగుతుండగా, ఆ నిర్ణయంపై స్టే విధించడంతో సినిమా విడుదలపై అనిశ్చితి నెలకొంది. ఈ నేపథ్యంలో నిర్మాతలు సుప్రీంకోర్టును ఆశ్రయించినా వారికి ఊరట లభించలేదు.

ఇక జనవరి 20న మద్రాస్ హైకోర్టు ఇవ్వనున్న ఉత్తర్వులు ‘జన నాయగన్’ సినిమా భవితవ్యాన్ని నిర్ణయించనున్నాయి.

హైదరాబాద్ డిసెంబర్ 28 (ప్రజా మంటలు):
తెలుగు ఫిల్మ్ చాంబర్ ఆఫ్ కామర్స్ ఎన్నికల్లో ప్రోగ్రెసివ్ ప్యానల్ ఘన విజయం సాధించింది. మొత్తం 44 స్థానాలకు జరిగిన ఎన్నికల్లో ప్రోగ్రెసివ్ ప్యానల్ 28 స్థానాలు కైవసం చేసుకోగా, మన ప్యానల్ 15 స్థానాల్లో విజయం సాధించింది.

ఛాంబర్ ఎన్నికల్లో రెండు ప్యానెల్స్ పోటీపడ్డాయి. నిర్మాతలు అల్లు అరవింద్, దిల్ రాజు, సురేశ్ బాబు బలపరుస్తున్న 'ప్రోగ్రెసివ్ ప్యానల్' ఒకవైపు.. సి. కల్యాణ్, ప్రసన్న కుమార్, చదలవాడ శ్రీనివాసరావు బలపరుస్తున్న 'మన ప్యానెల్' మరోవైపు రేసులో నిలిచాయి. చివరకు పెద్ద నిర్మాతలు, డిస్టిబ్యూటర్లు బలపరిచిన ప్రొగ్రెసివ్ ప్యానెల్ అభ్యర్థులే ఎక్కువగా విజయం సాధించారు.

సెక్టార్ వారీగా ఫలితాలు ఇలా ఉన్నాయి:

• ప్రొడ్యూసర్స్ సెక్టార్:

  • ప్రోగ్రెసివ్ ప్యానల్ – 5 స్థానాలు
  • మన ప్యానల్ – 7 స్థానాలు

• ఎగ్జిబిటర్స్ సెక్టార్:

  • ప్రోగ్రెసివ్ ప్యానల్ – 14 స్థానాలు
  • మన ప్యానల్ – 2 స్థానాలు

• స్టూడియో సెక్టార్:

  • ప్రోగ్రెసివ్ ప్యానల్ – 1 స్థానం
  • మన ప్యానల్ – 3 స్థానాలు

• డిస్ట్రిబ్యూషన్ సెక్టార్:

  • ప్రోగ్రెసివ్ ప్యానల్ – 8 స్థానాలు
  • మన ప్యానల్ – 3 స్థానాలు

మొత్తంగా ఫిల్మ్ ఛాంబర్ ఎన్నికల్లో ప్రోగ్రెసివ్ ప్యానల్ స్పష్టమైన ఆధిక్యంతో విజయం సాధించడంతో పరిశ్రమ వర్గాల్లో ఉత్సాహం నెలకొంది. కొత్త కార్యవర్గం ద్వారా చిత్ర పరిశ్రమ అభివృద్ధికి కీలక నిర్ణయాలు తీసుకుంటారని సినీ వర్గాలు ఆశాభావం వ్యక్తం చేస్తున్నాయి.

హైదరాబాద్ డిసెంబర్ 12 (ప్రజా మంటలు):

తెలంగాణలో సినిమా టికెట్ ధరల పెంపు ప్రతి సారి వివాదాలకు దారి తీస్తోంది. ప్రభుత్వమే నిర్ణయం తీసుకున్నా, వెంటనే కోర్టు పిటిషన్లు, విచారణలు జరుగుతుండటం సాధారణమైంది. తాజాగా అఖండ 2 సినిమా టికెట్ రేట్ల పెంపుపై దాఖలైన పిటిషన్‌పై విచారణలో హైకోర్టు ప్రభుత్వం తీసుకున్న నిర్ణయంపై అసంతృప్తి వ్యక్తం చేసింది.మంత్రి కోమటిరెడ్డి వెంకటరెడ్డి కూడా తన అసంతృప్తిని వెల్లడించారు.

ఈ నేపథ్యంలో రాష్ట్ర సినిమాటోగ్రఫీ శాఖ మంత్రి కోమటిరెడ్డి వెంకట్రెడ్డి తీవ్ర వ్యాఖ్యలు చేశారు.భవిష్యత్తులో సినిమా టికెట్ రేట్లను పెంచే ప్రసక్తే లేదని స్పష్టం చేశారు. ఇకపై రేట్లు పెంచాలని నిర్మాతలు, దర్శకులు తమ వద్దకు రావొద్దని చెప్పారు.

హీరోలకు వందల కోట్ల రెమ్యునరేషన్ ఇచ్చే పరిస్థితి ఎవరు సృష్టించారని మంత్రి ప్రశ్నించారు.తక్కువ టికెట్ ధరలుంటేనే కుటుంబాలు థియేటర్లకు వస్తాయని, అందుకే తెలంగాణలో ఇకపై రేట్ల పెంపు ఉండదని మరోసారి తెలిపారు.

అదేవిధంగా, అఖండ 2 మూవీకి సంబంధించి టికెట్ రేట్ల పెంపు, ప్రీమియర్ షోల అనుమతిపై ప్రభుత్వం జారీ చేసిన ఉత్తర్వులను సింగిల్ బెంచ్ రద్దు చేసిన తీర్పును డివిజన్ బెంచ్ కొట్టి వేసింది.
దీంతో రాష్ట్రవ్యాప్తంగా, పెరిగిన అఖండ 2 టికెట్ రేట్లు యథావిధిగా కొనసాగనున్నాయి.

హైదరాబాద్‌ డిసెంబర్ 11 (ప్రజా మంటలు):
బాలకృష్ణ నటించిన అఖండ 2 సినిమా కోసం ప్రభుత్వ ధరల కంటే అధికంగా టికెట్‌ రేట్లు వసూలు చేయడానికి అనుమతిస్తూ జారీ చేసిన జీవోను తెలంగాణ హైకోర్టు రద్దు చేసింది. టికెట్‌ రేట్లు పెంచడానికి సరైన ఆధారాలు, సమగ్ర కారణాలు లేకుండా ప్రభుత్వం ప్రత్యేక అనుమతి ఇవ్వడం చట్టానికి విరుద్ధమని కోర్టు స్పష్టం చేసింది.

ఈ జీవోను కొట్టివేసిన నేపథ్యంలో, ఈరోజు ప్రదర్శించనున్న ప్రత్యేక ప్రీమియర్ షో ను కూడా హైకోర్టు రద్దు చేసింది.

అఖండ 2 నిర్మాతలు, విడుదల సమయంలో భారీ డిమాండ్‌, నిర్మాణ వ్యయాలు పెరగడం వంటి కారణాలతో టికెట్‌ ధరలు పెంచేందుకు అనుమతి కోరగా ప్రభుత్వం ప్రత్యేక జీవో జారీ చేసింది. అయితే, ఈ నిర్ణయాన్ని సవాల్ చేస్తూ పలువురు వినియోగదారుల సంఘాలు, సామాజిక కార్యకర్తలు హైకోర్టును ఆశ్రయించారు.

కోర్టు ముఖ్య వ్యాఖ్యలు

హైకోర్టు విచారణలో ప్రభుత్వం అభ్యర్థనను పరిశీలించకుండా, ప్రజలపై అధిక భారంగా మారే నిర్ణయం తీసుకోవడం యుక్తం కాదని పేర్కొంది.
ప్రత్యేక సందర్భాలు కానప్పుడు టికెట్‌ రేట్లు పెంచడం అనుమతించరాదని, సినిమా పరిశ్రమకైనా ప్రత్యేక సడలింపులు ఇవ్వడం చట్టబద్ధం కాదని కోర్టు అభిప్రాయపడింది.

ప్రస్తుత టికెట్‌ రేట్లను పాటించాలని ఆదేశం

జీవో రద్దు చేసిన తరువాత, రాష్ట్రవ్యాప్తంగా ప్రస్తుత టికెట్ రేట్లను మాత్రమే అమలు చేయాలని సర్కారు, థియేటర్లకు హైకోర్టు స్పష్టమైన ఆదేశాలు జారీ చేసింది.
అధికారులు దీనిపై కఠినంగా నిఘా పెట్టాలని కూడా సూచించింది.

ప్రేక్షకులకు ఉపశమనం

ఈ తీర్పుతో ప్రేక్షకులు అధిక ధరల భారం నుండి తప్పించుకున్నారు. అఖండ 2 విడుదల సమయంలో భారీ హైప్ ఉండగా, పెరిగిన టికెట్‌ ధరలు సాధారణ ప్రేక్షకులకు భారమయ్యే అవకాశమున్న నేపథ్యంలో కోర్టు తీర్పు ప్రజానుకూలంగా పరిగణించబడుతోంది.