కరీంనగర్ మే 03 (ప్రజా మంటలు):

కరీంనగర్ జ్యోతినగర్‌లోని PMJ జ్యువెలరీ షాప్‌లో పట్టపగలే సంచలన దోపిడీ జరిగింది. ఐదుగురు దుండగులు తుపాకులతో షాప్‌లోకి చొరబడి సిబ్బందిపై కాల్పులు జరిపి, భారీగా బంగారు ఆభరణాలు దోచుకుని పరారయ్యారు. గాయపడిన సిబ్బందిని ఆసుపత్రికి తరలించగా, వారి పరిస్థితి విషమంగా ఉన్నట్లు సమాచారం.

ఘటన స్థలాన్ని కేంద్ర మంత్రి బండి సంజయ్, మాజీమంత్రి, MLA గంగుల కమలాకర్, ఐజి చంద్రశేఖర్, పోలీస్ కమిషనర్ గౌస్ పరిశీలించిన అనంతరం ఆస్పత్రిలో బాధితులను పరామర్శించారు.

ఘటనపై పోలీసులు వేగంగా స్పందించి, సీసీటీవీ దృశ్యాల ఆధారంగా దర్యాప్తు ప్రారంభించారు. ఇద్దరు బైకులపై ఐదుగురు నిందితులు పరారైనట్లు గుర్తించారు. నిందితులు పాత నేరస్తులేనని అధికారులు అనుమానిస్తున్నారు.
దర్యాప్తును వేగవంతం చేస్తూ మొత్తం 12 ప్రత్యేక బృందాలతో గాలింపు చేపట్టారు. నిందితులు ఉపయోగించిన తుపాకీలు, బుల్లెట్లు డ్రైనేజీలో లభ్యమయ్యాయి. షాప్‌లో కూడా కొన్ని బుల్లెట్లు స్వాధీనం చేసుకున్నారు.
ఘటన అనంతరం పోలీసులు కమీషనరేట్ వ్యాప్తంగా నాఖాబందీ నిర్వహించి వాహనాల తనిఖీలు కట్టుదిట్టం చేశారు. అనుమానాస్పద వ్యక్తులు, వాహనాలపై సమాచారం అందించాలని ప్రజలకు విజ్ఞప్తి చేశారు.

హైదరాబాద్, మే 03 (ప్రజా మంటలు):

తెలంగాణ రక్షణ సేన (టీఆర్ఎస్) రాష్ట్ర నాయకులు నిర్వహించిన ప్రెస్ మీట్‌లో బీఆర్ఎస్ నాయకత్వంపై తీవ్ర విమర్శలు గుప్పించారు. టీఆర్ఎస్ రాష్ట్ర నాయకులు శ్రీకాంత్ గౌడ్ మాట్లాడుతూ, కవిత గారి పెరుగుతున్న ప్రజాదరణను చూసి బీఆర్ఎస్ నేతలు భయపడుతున్నారని వ్యాఖ్యానించారు.
కవిత గారిపై కేపీ వివేకానంద చేసిన వ్యాఖ్యలను ఆయన తీవ్రంగా ఖండించారు. గతంలో మహాకూటమి నుంచి పోటీ చేసి ఓడిపోయిన తర్వాత ఇతర పార్టీలకు దగ్గరైన వ్యక్తి కవితపై విమర్శలు చేయడం ఆశ్చర్యకరమని అన్నారు. తెలంగాణ ఉద్యమకారులకు అవకాశాలు కల్పించడంలో బీఆర్ఎస్ నాయకులు విఫలమయ్యారని విమర్శించారు.
మున్సిపల్, కార్పొరేషన్ ఎన్నికల్లో ఉద్యమకారులకు అవకాశాలు ఇవ్వలేదని ఆరోపించారు. గండి మైసమ్మ వద్ద నిర్మించిన అమరుల స్థూపాన్ని ఇప్పటికీ ప్రారంభించకపోవడం ప్రభుత్వ నిర్లక్ష్యానికి నిదర్శనమని అన్నారు.
కుత్బుల్లాపూర్ ప్రాంతంలో విలువైన భూముల ఆక్రమణపై కూడా ఆయన ఆరోపణలు చేశారు. కొంపల్లి, సుచిత్ర, బాచుపల్లి, జీడిమెట్ల, పావురం పేట ప్రాంతాల్లో కోట్లాది రూపాయల భూములు అక్రమంగా స్వాధీనం చేసుకున్నారని అన్నారు.
అసెంబ్లీలో ప్రజా సమస్యలపై పోరాడాల్సిన నాయకులు ప్రజల్లో కనిపించడం లేదని విమర్శించారు. వెలుగుమట్లలో ఇళ్ల కూల్చివేతలు, వికారాబాద్‌లో అసైన్డ్ భూముల ఆక్రమణ వంటి ఘటనలపై బీఆర్ఎస్ స్పందించలేదని ఆరోపించారు.
ప్రజా సమస్యలపై పోరాటం చేయకుండా సోషల్ మీడియా, ఫోటోలకు మాత్రమే పరిమితమవుతున్నారని విమర్శించారు. రైతుల కోసం కొనుగోలు కేంద్రాల ఏర్పాటు వంటి కీలక అంశాల్లో కూడా చర్యలు తీసుకోవడం లేదన్నారు.
టీఆర్ఎస్ నాయకులు ప్రజా ఉద్యమాలతో ముందుకు సాగుతున్నామని, తెలంగాణ ప్రజలకు అన్యాయం జరిగితే ధిక్కార స్వరాలమవుతామని స్పష్టం చేశారు. కాళోజీ, దాశరథి, సమ్మక్క-సారలమ్మ, రాణి రుద్రమ్మల స్ఫూర్తితో పోరాటం కొనసాగిస్తామని తెలిపారు.
ఇదే కార్యక్రమంలో మరో రాష్ట్ర నాయకుడు ఎత్తరి మారయ్య మాట్లాడుతూ, కవిత గారిపై విమర్శలు చేసే స్థాయి కేపీ వివేకానందకు లేదని అన్నారు. కవితపై విమర్శలు చేసిన నాటి నుంచే ఆయన రాజకీయ కౌంట్‌డౌన్ ప్రారంభమైందని వ్యాఖ్యానించారు.
కుత్బుల్లాపూర్‌లో ఉద్యమకారులకు అవకాశాలు ఇవ్వకుండా కుటుంబ సభ్యులు, అనుచరులకే ప్రాధాన్యం ఇచ్చారని ఆరోపించారు. గత ఎన్నికల్లో టికెట్ విషయంలో జరిగిన విషయాలను కూడా ప్రస్తావిస్తూ, తమ సహకారంతోనే ఆయన గెలిచారని పేర్కొన్నారు.
కవిత గారి పెరుగుతున్న ప్రజాదరణను తట్టుకోలేక బీఆర్ఎస్ నాయకులు ఇష్టానుసారం మాట్లాడుతున్నారని అన్నారు. ఇకపై కవితపై విమర్శలు చేస్తే తగిన సమాధానం ఇస్తామని హెచ్చరించారు.

జగిత్యాల, మే 02 (ప్రజా మంటలు):

జగిత్యాల జిల్లా డీసీపీవో ఎం. హరీష్‌ను సేవల నుంచి శాశ్వతంగా తొలగిస్తూ జిల్లా కలెక్టర్ సత్యప్రసాద్ ఉత్తర్వులు జారీ చేశారు. అధికార దుర్వినియోగం, మహిళా ఉద్యోగులపై వేధింపులు, హాజరు రికార్డుల్లో మార్పులు వంటి ఆరోపణలు ఆయనపై నిర్ధారణ కావడంతో ఈ నిర్ణయం తీసుకున్నారు.
ఈ అంశాలపై గతంలోనే హరీష్‌కు షోకాజ్ నోటీసులు జారీ చేసి హెచ్చరించినప్పటికీ ప్రవర్తనలో మార్పు రాలేదు. అనంతరం అందిన ఫిర్యాదుల మేరకు కంప్లైంట్స్ కమిటీ సమగ్ర విచారణ చేపట్టి ఆరోపణలు నిజమని నిర్ధారించింది. కమిటీ నివేదిక ఆధారంగా కలెక్టర్ ఈ చర్యలు తీసుకున్నారు.
హరీష్‌కు సంబంధించిన బాధ్యతలు, రికార్డులను జిల్లా వెల్ఫేర్ అధికారికి అప్పగించాలని ఆదేశించారు. ఈ ఘటన జిల్లాలో చర్చనీయాంశంగా మారింది.

జగిత్యాల మే1(ప్రజా మంటలు)
సురభి గోశాలలో నిర్వహించిన సామూహిక శ్రీ సత్యనారాయణ స్వామి వ్రతం విజయవంతంగా, ఎంతో భక్తి శ్రద్ధలతో ముగిసింది. 11 మంది దంపతులు కలసి, ఒకే సంకల్పంతో, ఒకే భక్తితో వ్రతం నిర్వహించడం చూడటం నిజంగా హృదయానికి హత్తుకునే అనుభూతనీ నిర్వాహకులు అన్నారు.

మొదట గోమాతకు పూజలు చేసి, అనంతరం శ్రీకృష్ణ పరమాత్ముని సన్నిధిలో భక్తి పరవశంతో వ్రతాలు నిర్వహించిన ప్రతి క్షణం ఎంతో పవిత్రంగా అనిపించింది. ప్రతి దంపతిలోనూ కనిపించిన ఆ భక్తి, ఆ నమ్మకం… ఈ కార్యక్రమానికి అసలైన మహిమను తెచ్చింది.

ఈ కార్యక్రమంలో గోశాల అధ్యక్షులు డాక్టర్ తురగా రాజిరెడ్డి , ఉపాధ్యక్షులు మంచాల జగన్ గారు, కార్యదర్శి బండారి కమలాకర్ రావు , కోశాధికారి జలగం జలేందర్ రావు ,సామాజిక కార్య కర్త తవుటు రాంచంద్రం, సభ్యులు ఈశ్వరయ్య , కోటగిరి రాజేశ్వర్ , అలిమిళ్ల ఉష కిరణ్ , శ్రీనివాస్ గారు మరియు మరెన్నో మంది పాల్గొని కార్యక్రమాన్ని మరింత గొప్పగా తీర్చిదిద్దారు.

విచ్చేసిన ప్రతి భక్తునికి ప్రేమతో అన్నప్రసాదం వితరణ చేయడం ద్వారా ఈ కార్యక్రమం మరింత సార్థకమైంది.
ఇదేవిధంగా, ఈ పవిత్ర కార్యక్రమం ప్రతి పౌర్ణమి రోజున నిరంతరం నిర్వహించబడుతుంది. ఈ దైవిక అవకాశాన్ని ప్రతి భక్తుడు సద్వినియోగం చేసుకోవాలని నిర్వాహకులు హృదయపూర్వకంగా పిలుపునిస్తున్నారు.

ఇలాంటి పుణ్యకార్యాలు మన సమాజాన్ని ఒకటి చేస్తాయి… మన సంస్కృతిని నిలబెడతాయి… మనలోని దైవత్వాన్ని వెలికి తీస్తాయి.

ఈ కార్యక్రమంలో పాల్గొన్న ప్రతి ఒక్కరికీ హృదయపూర్వక ధన్యవాదాలు 
శ్రీ సత్యనారాయణ స్వామి వారి ఆశీస్సులు అందరి కుటుంబాలపై ఎల్లప్పుడూ ఉండాలని కోరుకుంటున్నా రు.

జగిత్యాల ఏప్రిల్ 30 (ప్రజా మంటలు)
 పట్టణంలోని శ్రీ వేణుగోపాలస్వామి ఆలయంలో గురువారం ఉదయం 11 గంటలకు బ్రహ్మోత్సవ వేడుకల సందర్భంగా స్వామివారికి ప్రత్యేక పూజలను నిర్వహించి అనంతరం శ్రీ లక్ష్మీనరసింహ జయంతి సందర్భంగా స్వామివారికి ప్రత్యేక అభిషేకాలు నిర్వహించారు. ఈ బ్రహ్మోత్సవాల్లో భాగంగా   నవగ్రహ పూజా  అలాగే సంతాన గోపాల హోమ పూజా కార్యక్రమంలో భక్తులు విశేష సంఖ్యలో పాల్గొన్నారు  .

అనంతరం భక్తులకు తీర్థప్రసాలను అందజేసి ఆశీర్వచనాన్నిజేశారు. విచ్చేసిన భక్తులకు అన్న ప్రసాదం కార్యక్రమాన్ని నిర్వహించారు. కాగా సాయంత్రం వసంతోత్సవం నిర్వహించారు వేదికను వివిధ ఫల పుష్పాదులతో అలంకరించారు ఉత్సవ మూర్తులను ఉంచి వసంతోత్సవం కొనసాగించారు.ఈ కార్యక్రమంలో ఆలయ అర్చకులు  ప్రముఖ జ్యోతిష్య వాస్తు పౌరాణిక వేద పండితులు శ్రీమాన్ నంబి వేణుగోపాలాచార్య కౌశిక, నంబి రాం గోపాల చార్య, నంబి సత్యనారాయణ ఆచార్య, నంబి మధుసూదన్ ఆచార్య, నంబి నృసింహ ఆచార్యులు నంబి వాసుదేవ ఆచార్య నందకిషోర్ ఆచార్య భక్తులు ప్రముఖులు పాల్గొన్నారు.

హైదరాబాద్, ఏప్రిల్ 30 (ప్రజా మంటలు):

జగిత్యాలకు చెందిన సినీ దర్శకుడు బండి రఘురాం ఏప్రిల్ 28న కన్నుమూశారు. హైదరాబాద్‌లోని యూసుఫ్‌గూడలో నివాసముంటున్న ఆయన సాయంత్రం పార్క్‌లో నడుస్తూ ఒక్కసారిగా కుప్పకూలిపోయారు. గుండెపోటుతో మృతిచెందినట్లు కుటుంబ సభ్యులు తెలిపారు. ఆయన మృతి సినీ, జర్నలిజం వర్గాల్లో తీవ్ర విషాదాన్ని నింపింది.
రఘురాం జగిత్యాలకు చెందిన బండి రాధాకృష్ణ, విజయ దంపతుల రెండో కుమారుడు. ఆయన తండ్రి రాధాకృష్ణ జగిత్యాలలో ఇంగ్లీష్ లెక్చరర్‌గా సేవలందించి, మూడేళ్ల క్రితం మరణించారు.
డిగ్రీ వరకు జగిత్యాలలోనే విద్యాభ్యాసం పూర్తి చేసిన రఘురాం, అనంతరం ఉస్మానియా విశ్వవిద్యాలయంలో జర్నలిజంలో ఉన్నత విద్యను అభ్యసించారు. ఇంగ్లీష్‌లో ఎంఏ, పీహెచ్‌డీ పూర్తి చేసి కొంతకాలం అసిస్టెంట్ ప్రొఫెసర్‌గా పనిచేశారు. అనంతరం జర్నలిజం, సినీ రంగాలపై ఉన్న ఆసక్తితో జర్నలిస్టుగా, రచయితగా, సినీ విశ్లేషకుడిగా తన ప్రస్థానాన్ని కొనసాగించారు.
ఈటీవీ, వి6, ఇండియన్ ఎక్స్‌ప్రెస్ వంటి ప్రముఖ సంస్థల్లో పనిచేసిన ఆయన, తర్వాత సినీ రంగంలోకి అడుగుపెట్టి ప్రముఖ దర్శకుడు సానా యాది రెడ్డి వద్ద సహాయ దర్శకుడిగా పనిచేశారు. 2004లో వచ్చిన ‘వరం’ చిత్రంతో దర్శకుడిగా పరిచయమయ్యారు.
ఉన్నత విద్యావంతుడిగా, సృజనాత్మక వ్యక్తిగా గుర్తింపు పొందిన రఘురాం 56 ఏళ్ల వయసులోనే కన్నుమూయడం అత్యంత విషాదకరం. ఆయనకు భార్య, కుమారుడు, కుమార్తె ఉన్నారు.
రఘురాం మృతికి జగిత్యాల ప్రాంతానికి చెందిన పలువురు సాహితీ, సినీ, మీడియా ప్రముఖులు సంతాపం వ్యక్తం చేశారు.

జగిత్యాల ఏప్రిల్ 29 ( ప్రజా మంటలు) 
జిల్లా కేంద్రానికి చెందిన ఎస్ ఎస్ ఎస్ ఎం హై స్కూల్ కు చెందిన సింగిడి చక్రిత 561/600, ఎంబారి చరణ్ 547/600 బుధవారం విడుదలైన ఎస్ఎస్సి ఫలితాలలో ఉత్తమ మార్కులు సాధించినారు. 500 పైబడి 45 శాతం విద్యార్థులు ఫలితాలు సాధించారు. 100% విద్యార్థులు ఉత్తీర్ణత సాధించారు.

ఈ సందర్భంగా కరస్పాండెంట్ కాసుగంటి. జగదీష్ చందర్ రావు, ప్రిన్సిపల్ అనగళ్ల రాజేందర్ సీనియర్ ఉపాధ్యాయులు బాబురావు నేరెళ్ల శ్రీనివాస్ చారి,ఉపాధ్యాయ బృందం ఉత్తమ ఫలితాలు సాధించిన విద్యార్థులను అభినందించారు.

జగిత్యాల ఏప్రిల్ 29 ( ప్రజా మంటలు)
 పొలాస గ్రామానికి చెందిన పాలెపు రాజు కూతురు పాలెపు హాసిని శర్మ జిల్లా కేంద్రంలోని శ్రీనిధి ఒలంపియాడ్ పాఠశాలలో చదువుచున్నది. బుధవారం విడుదలైన ఎస్ఎస్ఎస్సి ఫలితాలలో 578/600 మార్కులు సాధించింది. ఈ సందర్భంగా శ్రీనిధి ఒలంపియాడ్ పాఠశాల కరస్పాండెంట్ ఎం రాజేందర్ ప్రిన్సిపల్ మేఘమాల డైరెక్టర్ నేరెళ్ల మల్లేశం విద్యార్థిని అభినందించారు.

జగిత్యాల ఏప్రిల్ 29 ( ప్రజా మంటలు)

పట్టణంలోని సిద్ధార్థ విద్యా సంస్థలు  మరోసారి తమ ప్రతిభను చాటుకుంటూ SSC ఫలితాలలో రాష్ట్ర స్థాయిలో అద్భుత విజయాన్ని సాధించాయి. 

ఈరోజు విడుదలైన పదవ తరగతి పరీక్షా ఫలితాలలో రాష్ట్ర స్థాయి లో 591, 590  మార్కులతో  జిల్లా స్థాయిలో మొదటి స్థానంలో నిలిచారు. అదే విధంగా 591,590 తో పాటు   580 పైన 21 మంది విద్యార్థులు, 570 పైన 63 విద్యార్థులు , 550 పైన 149 విద్యార్థులు, 500 పైన 324 విద్యార్థులు  అత్యుత్తమ మార్కులు సాధించి సంస్థకు ప్రత్యేక గుర్తింపును తీసుకువచ్చారు. 

అదే విధంగా అత్యుత్తమ ఫలితాలు సాధించిన విద్యార్థులను, వారి తల్లిదండ్రులను మరియు ఉపాధ్యాయులను  జ్యోతి హైస్కూల్ ఐఐటీ అకాడమీ, మానస స్కూల్ ఆఫ్ ఎక్సలెన్స్, సూర్య గ్లోబల్ స్కూల్ యాజమాన్యాలు అభినందించారు. భవిష్యత్తులో కూడా ఇలాంటి విజయాలు కొనసాగుతాయని ఆశాభావం వ్యక్తం చేశారు.

ఈ కార్యక్రమంలో పాఠశాల డైరెక్టర్స్ బోయినపల్లి శ్రీధర్ రావు, బియ్యాల హరి చరణ్ రావు, రజిత, మౌనిక  హరి చరణ్ రావు,సుమన్,  అజిత, ఉపాధ్యాయ బృందం, విద్యార్థిని విద్యార్థులు పాల్గొన్నారు.

ధర్మపురి ఏప్రిల్ 28 (ప్రజా మంటలు)

రానున్న 2027  గోదావరి పుష్కరాల ఏర్పాట్లపై  సమీక్ష
పుష్కరాలకు వచ్చే భక్తులకు ఎలాంటి అసౌకర్యం లేకుండా ఏర్పాట్లు చేయాలని మంత్రి అడ్లూరి లక్ష్మణ్ కుమార్ అన్నారు.
2027లో జరగనున్న గోదావరి పుష్కరాల ఏర్పాట్ల నేపథ్యంలో చేపట్టాల్సిన భూసేకరణ (ల్యాండ్ అక్విజిషన్) మరియు దేవాలయ అభివృద్ధి పనులపై  టెంపుల్ మాస్టర్ ప్లాన్, గోదావరి నది తీరం వెంట పుష్కర ఘాట్లు పై రాష్ట్ర ఎస్సీ, ఎస్టీ, శాఖ మంత్రి అడ్లూరి లక్ష్మణ్ కుమార్ మరియు రాష్ట్ర దేవదాయ శాఖ కమిషనర్ ఎం.హనుమంతరావు జిల్లా కలెక్టర్ బి. సత్య ప్రసాద్  తో కలిసి సమీక్ష సమావేశం నిర్వహించారు.

 రాష్ట్ర సంక్షేమ శాఖ మంత్రి అడ్లూరి లక్ష్మణ్ కుమార్ మాట్లాడుతూ

రానున్న గోదావరి పుష్కరాలు 2027 రాష్ట్రానికి అత్యంత ప్రతిష్ఠాత్మకమైన ఆధ్యాత్మిక కార్యక్రమమని తెలిపారు. పుష్కరాలకు దేశం నలుమూలల నుంచి భారీ సంఖ్యలో భక్తులు తరలివస్తారని పేర్కొన్నారు. అందువల్ల భక్తులకు ఎలాంటి ఇబ్బందులు కలగకుండా ముందస్తుగా సమగ్ర ప్రణాళికతో ఏర్పాట్లు చేయాలని అధికారులకు సూచించారు. పుష్కరాలకు అవసరమైన భూముల సేకరణ ప్రక్రియను వేగవంతంగా పూర్తి చేసి అభివృద్ధి పనులను ఏర్పాట్లను త్వరితగతిన ప్రారంభించాలని ఆదేశించారు.

జిల్లా కలెక్టర్ బి. సత్య ప్రసాద్ మాట్లాడుతూ 

2027 గోదావరి పుష్కరాల సందర్భంగా ధర్మపురి క్షేత్రానికి వచ్చే భక్తులకు మెరుగైన సౌకర్యాలు కల్పించేందుకు ప్రభుత్వం ప్రత్యేక చర్యలు చేపడుతోందని తెలిపారు. ఘాట్లు, రహదారులు, పార్కింగ్ స్థలాలు, తాగునీరు, పారిశుధ్యం, భద్రత వంటి మౌలిక సదుపాయాలను సమగ్రంగా అభివృద్ధి చేయాలని సంబంధిత అధికారులకు సూచించారు. పుష్కరాల ఏర్పాట్లలో ఎటువంటి లోపాలు లేకుండా అన్ని శాఖలు సమన్వయంతో పనిచేయాలని తెలిపారు.

ఈ సమావేశంలో జగిత్యాల జిల్లా అదనపు కలెక్టర్  (స్థానిక సంస్థల) బి రాజ గౌడ్ , జగిత్యాల  ఆర్డీవో మధుసూదన్, ధర్మపురి లక్ష్మీ నరసింహ స్వామి టెంపుల్ ఈవో శ్రీనివాస్,మున్సిపల్  కమిషనర్, శ్రీనివాస్, ఆర్ అండ్ బి ఈ ఈ శ్రీనివాస్, పంచాయితీ ఈ ఈ పి ఆర్, ధర్మపురి తహసీల్దార్ శ్రీనివాస్,మరియు సంబంధిత శాఖల అధికారులు పాల్గొన్నారు.

కొండగట్టు అంజన్న స్వామిని దర్శించుకున్న దేవదాయ కమిషనర్ ఎం హనుమంతరావు 

మంగళవారం పవిత్ర పుణ్యక్షేత్రమైన కొండగట్టు ఆంజనేయ స్వామి ఆలయాన్ని దేవదాయ శాఖ కమిషనర్ ఎం హనుమంతరావు బుధవారం సందర్శించారు .ఈ సందర్భంగా ఆలయ అర్చకులు ఆలయ సంప్రదాయం ప్రకారం మంగళ   వాద్యాలతో పూర్ణకుంభ స్వాగతం పలికారు. ఆలయ ఈవో స్వామివారి శేష వస్త్రంతో ప్రసాదం అందజేశారు. ఆలయ అర్చకులు వేద ఆశీర్వచనం చేశారు. 

జగిత్యాల ఏప్రిల్ 26 (ప్రజా మంటలు)

శ్రీ వాసవి కన్యకా పరమేశ్వరి మాతా జయంతి సందర్భంగా జగిత్యాల పట్టణం లో ఆర్య వైశ్య సంఘం ఆద్వర్యం లో జయంతి వేడుకల్లో పాల్గొని పోచమ్మ ఆలయం నుండి వాసవి మాత ఆలయానికి వాసవి కన్యకా పరమేశ్వరి మాతని పల్లకిలో తీసుకొచ్చే కార్యక్రమంలో పాల్గొని పల్లకి మోసి ప్రత్యేక పూజలు నిర్వహించిన జగిత్యాల శాసనసభ్యులు డా సంజయ్ కుమార్ . ఈ సందర్భంగా ఎమ్మెల్యే మాట్లాడుతూ తెలంగాణ రాష్ట్ర ప్రభుత్వం వాసవి మాత జయంతి ప్రభుత్వ పరంగా నిర్వహించడం హర్షణీయం అన్నారు.

తెలంగాణ రాష్ట్ర ప్రభుత్వం అన్ని వర్గాల ప్రజల సంక్షేమం కోసం కృషి చేస్తుంది. మన ధర్మాన్ని మనం ప్రేమిస్తూ ఇతర మతాలను గౌరవించాలి అన్నారు.
వైశ్య సంఘం అభివ్రుద్ది కి నిధులు మంజూరు చేసి అభివ్రుద్ది చేయటం జరిగింది,పట్టణంలో అన్ని కుల సంఘాల భవనాలకు నిధులను మంజూరు చేయటం జరిగింది అని అన్నారు. వాసవి మాత దయ తో అన్ని వర్గాల ప్రజలు సుఖ శాంతులతో ఉండాలని ఆకాంక్షించారు.

ఈ కార్యక్రమంలో   టిపిసిసి సెక్రటరీ బండ శంకర్, మాజీ మున్సిపల్ చైర్మన్ గోలి శ్రీనివాస్, వైశ్య సంఘం అధ్యక్షుడు నవీన్,ప్రధాన కార్యదర్శి బోడ్ల జగదీష్,కోశాధికారి శ్రీనివాస్ ఆలయ ఛైర్మెన్ రాజేందర్, ఎయంసి  డైరెక్టర్ రమేష్,అరవింద్, సంతోష్,సునీల్, వైశ్య సంఘం సభ్యులు, వాసవి మాత భక్తులు,
తదితరులు పాల్గొన్నారు.