ఇంట్లో రూ.32.31 లక్షల అక్రమ నగదు స్వాధీనం

పెద్దపల్లి, జూలై 14 (ప్రజా మంటలు):

 పెద్దపల్లి మున్సిపాలిటీలో అసిస్టెంట్ ఇంజనీర్‌గా పనిచేస్తున్న కల్లేపల్లి సతీష్ కుమార్ అవినీతి నిరోధక శాఖ (ఏసీబీ) అధికారులకు రెడ్‌హ్యాండెడ్‌గా చిక్కారు.
కాంట్రాక్టర్‌కు సంబంధించిన బిల్లును ప్రాసెస్ చేసి టీయూఎఫ్ఐడీసీ (TUFIDC)కి పంపేందుకు రూ.2 లక్షల లంచం డిమాండ్ చేసి స్వీకరిస్తుండగా కరీంనగర్ ఏసీబీ అధికారులు దాడి నిర్వహించి నిందితుడిని పట్టుకున్నారు.
అనంతరం నిందితుడి నివాసంలో నిర్వహించిన సోదాల్లో రూ.32.31 లక్షల లెక్కల్లో చూపని నగదు స్వాధీనం చేసుకున్నారు. ఈ నగదు చట్టబద్ధ ఆదాయానికి సంబంధించిన ఆధారాలు చూపలేకపోవడంతో అధికారులు స్వాధీనం చేసుకున్నట్లు తెలిపారు.
ఏసీబీ అధికారులు నిందితుడిని అరెస్ట్ చేసి ప్రత్యేక ఏసీబీ న్యాయస్థానంలో హాజరుపరిచారు. కేసు నమోదు చేసి దర్యాప్తు కొనసాగిస్తున్నట్లు అధికారులు వెల్లడించారు.

హైదరాబాద్, జూలై 3 (ప్రజా మంటలు):

తెలంగాణ మానవ హక్కుల కమిషన్ రెండు వేర్వేరు అంశాలపై స్వయంస్పూర్తితో (సుమోటో) కేసులు నమోదు చేసింది.
మొదటి కేసులో రాజన్న సిరిసిల్ల జిల్లా బొంగులకింద గ్రామంలో నాలుగేళ్ల చిన్నారిపై వీధికుక్క దాడి చేసి తీవ్రంగా గాయపరిచిన ఘటనను కమిషన్ పరిగణనలోకి తీసుకుంది. ఈ ఘటనపై సమగ్ర నివేదికను ఆగస్టు 3, 2026లోగా సమర్పించాలని జిల్లా కలెక్టర్‌ను ఆదేశించింది.
రెండో కేసులో తెలంగాణ వ్యాప్తంగా ప్రభుత్వ పాఠశాలల్లో తరగతి గదులు, మరుగుదొడ్లు తదితర మౌలిక సదుపాయాల కొరతపై వెలువడిన వార్తా కథనాన్ని సుమోటోగా స్వీకరించింది. ఈ అంశంపై సమగ్ర నివేదికను ఆగస్టు 3, 2026లోగా పాఠశాల విద్యాశాఖ ముఖ్య కార్యదర్శి సమర్పించాలని కమిషన్ ఆదేశించింది.

రూ.100 కోట్ల ప్రైవేట్ పాఠశాలల అనుమతుల మోసం కేసు

చెన్నై, జూన్ 28 (ప్రజా మంటలు):

తమిళనాడులో ప్రైవేట్ పాఠశాలలకు ప్రభుత్వ అనుమతులు, శాశ్వత గుర్తింపు (Recognition), గ్రేడ్ అప్‌గ్రేడేషన్, డీటీసీపీ (DTCP), సీఎండీఏ (CMDA) అనుమతులు ఇప్పిస్తానని నమ్మబలికి రూ.100 కోట్లకు పైగా వసూలు చేసి మోసానికి పాల్పడినట్లు ఆరోపణలు ఎదుర్కొంటున్న తమిళనాడు ప్రైవేట్ పాఠశాలల సంఘం అధ్యక్షుడు పి.డి. (బి.టి.) అరసకుమార్ను చెన్నై సెంట్రల్ క్రైమ్ బ్రాంచ్ (CCB) పోలీసులు శనివారం అరెస్టు చేశారు.

ఈ కేసు రాష్ట్రవ్యాప్తంగా తీవ్ర సంచలనం సృష్టించింది. గత రెండేళ్లుగా ప్రభుత్వ అనుమతులు, గుర్తింపుల కోసం ఎదురుచూస్తున్న అనేక ప్రైవేట్ పాఠశాలల యాజమాన్యాలను లక్ష్యంగా చేసుకుని అరసకుమార్ భారీ మొత్తంలో డబ్బు వసూలు చేసినట్లు ఆరోపణలు ఉన్నాయి.

ఫిర్యాదు ఎలా వచ్చింది?

ఫెడరేషన్ ఆఫ్ అసోసియేషన్స్ ఆఫ్ ప్రైవేట్ స్కూల్స్ ఇన్ తమిళనాడు కార్యదర్శి ఇళంగోవన్ చెన్నై పోలీసులకు ఫిర్యాదు చేశారు. రాష్ట్రంలోని వందలాది పాఠశాలల యాజమాన్యాల నుంచి భారీ మొత్తంలో డబ్బు తీసుకున్నప్పటికీ, హామీ ఇచ్చిన అనుమతులు ఇప్పించలేదని, తీసుకున్న మొత్తాన్ని కూడా తిరిగి చెల్లించలేదని ఆయన ఫిర్యాదులో పేర్కొన్నారు.

మోసం ఎలా జరిగిందంటే...

పోలీసుల దర్యాప్తు ప్రకారం, సాలిగ్రామంలో "తమిళనాడు ప్రైవేట్ స్కూల్స్ అసోసియేషన్" పేరుతో సంస్థను నిర్వహించిన అరసకుమార్, తనకు ఉన్న రాజకీయ, ఉన్నతాధికారుల పరిచయాలను ఉపయోగించి ప్రభుత్వ అనుమతులు ఇప్పిస్తానని పాఠశాలల యాజమాన్యాలను నమ్మించారు.

శాశ్వత గుర్తింపు, గ్రేడ్ అప్‌గ్రేడేషన్, భవన అనుమతులు, ఇతర అధికారిక క్లియరెన్స్‌లు తక్కువ సమయంలో ఇప్పిస్తానని హామీ ఇస్తూ ఒక్కో పాఠశాల నుంచి లక్షల నుంచి కోట్ల రూపాయల వరకు వసూలు చేసినట్లు పోలీసులు గుర్తించారు. రాష్ట్రవ్యాప్తంగా ఈ విధంగా రూ.100 కోట్లకు పైగా వసూలు చేసినట్లు ప్రాథమిక విచారణలో వెల్లడైంది.

అనుమతులు లేవు... డబ్బూ లేదు

డబ్బు తీసుకున్నప్పటికీ సంబంధిత ప్రభుత్వ శాఖల నుంచి ఎలాంటి అనుమతులు ఇప్పించలేదని, బాధిత పాఠశాలల యాజమాన్యాలు డబ్బు తిరిగి కోరగా తప్పించుకుంటూ వచ్చారని ఫిర్యాదులో పేర్కొన్నారు. దీంతో బాధితులు పోలీసులను ఆశ్రయించారు.

అరెస్ట్... కోర్టులో హాజరు

ఫిర్యాదు ఆధారంగా కేసు నమోదు చేసిన చెన్నై సెంట్రల్ క్రైమ్ బ్రాంచ్ పోలీసులు పలు ఆధారాలను సేకరించిన అనంతరం అరసకుమార్‌ను అరెస్టు చేశారు. అనంతరం ఆయనను న్యాయస్థానంలో హాజరుపరిచి రిమాండ్‌కు తరలించారు.

మరికొందరిపై కూడా దర్యాప్తు

ఈ మోసం ఒక్క వ్యక్తితో పరిమితం కాలేదని పోలీసులు అనుమానిస్తున్నారు. డబ్బు లావాదేవీలు, మధ్యవర్తుల పాత్ర, రాజకీయ లేదా అధికార వర్గాల ప్రమేయం ఉందా అనే కోణంలో కూడా దర్యాప్తు కొనసాగుతోంది. ఈ కేసులో మరికొందరిపై కూడా చర్యలు తీసుకునే అవకాశం ఉందని అధికారులు తెలిపారు.

రాజకీయ చర్చ

అరసకుమార్ డీఎంకేకు చెందిన వ్యక్తిగా ప్రచారంలో ఉండటంతో ఈ వ్యవహారం రాజకీయంగానూ చర్చనీయాంశమైంది. అయితే ఈ కేసులో దర్యాప్తు కొనసాగుతోందని, కోర్టులో ఆరోపణలు నిరూపితమయ్యే వరకు అవి ఆరోపణలుగానే పరిగణించాలని న్యాయ నిపుణులు సూచిస్తున్నారు.

జగిత్యాల, జూన్ 20 (ప్రజా మంటలు):
జగిత్యాల రూరల్ మండలం చల్‌గల్ శివార్లలో గంజాయి తరలిస్తున్నారనే పక్కా సమాచారంతో రూరల్ పోలీసులు తనిఖీలు నిర్వహించారు. ఈ సందర్భంగా రాయికల్ మండలం ఉప్పుమడుగు గ్రామానికి చెందిన దగ్గు రాజేష్ వద్ద నుంచి 120 గ్రాముల గంజాయిని స్వాధీనం చేసుకున్నారు.
నిందితుడిని అదుపులోకి తీసుకుని అరెస్ట్ చేసి, అనంతరం రిమాండ్‌కు తరలించినట్లు రూరల్ ఎస్‌ఐ ఉమాసాగర్ తెలిపారు. గంజాయి రవాణా, విక్రయాలపై ప్రత్యేక నిఘా కొనసాగిస్తున్నామని ఆయన పేర్కొన్నారు.

ఆరుగురు నిందితుల అరెస్ట్.. రూ.14.16 లక్షల నగదు స్వాధీనం, రూ.46.21 లక్షల ఖాతాలు ఫ్రీజ్

సిరిసిల్ల, జూన్ 20 (ప్రజా మంటలు):

ప్రభుత్వ ధాన్యం కొనుగోలు ప్రక్రియలో నకిలీ ట్రక్ చిట్టీలు సృష్టించి సుమారు రూ.91 లక్షల ప్రభుత్వ నిధులను దుర్వినియోగం చేసిన కేసులో ఆరుగురు నిందితులను సిరిసిల్ల టౌన్ పోలీసులు అరెస్ట్ చేసినట్లు జిల్లా ఎస్పీ మహేష్ బి. గితే తెలిపారు. సిరిసిల్ల పట్టణ పోలీస్ స్టేషన్‌లో ఏర్పాటు చేసిన మీడియా సమావేశంలో ఆయన కేసు వివరాలను వెల్లడించారు.
పెద్దూర్ అపారెల్ పార్క్ గోదాం మేనేజర్ ఉత్కం విజయ్ (ఏ1), వాసాల గణేష్ (ఏ5) కలిసి ఐకేపీ కేంద్రాల నుంచి ధాన్యం వచ్చినట్లు నకిలీ ట్రక్ చీటీలు సృష్టించినట్లు విచారణలో తేలింది. రుద్రంగి ఐకేపీ కేంద్రం ఇన్‌చార్జి గడ్డం స్వామి (ఏ3) జారీ చేసిన నకిలీ ట్రక్ చీటీలను సివిల్ సప్లై వెబ్‌సైట్‌లో అప్‌లోడ్ చేసి విడుదలైన నిధులను పరస్పరం పంచుకున్నట్లు పోలీసులు గుర్తించారు.
డీఎంఓ కార్యాలయ మండల స్థాయి కో-ఆర్డినేటర్ కమ్మరి రాజశేఖర్ (ఏ2), బద్దెనపల్లి పీఏసీఎస్ కేంద్రం ఇన్‌చార్జి గాజుల నవీన్ (ఏ6) సహకారంతో మరో నకిలీ ట్రక్ చీటీ రూపొందించి ప్రభుత్వ నిధులను అక్రమంగా పొందినట్లు దర్యాప్తులో వెల్లడైంది. అలాగే వివిధ ఐకేపీ కేంద్రాల నుంచి వచ్చిన 10 లారీల ధాన్యాన్ని గోదాంలో దించకుండానే ఆన్‌లైన్‌లో దించినట్లు నమోదు చేసి, అనంతరం ఆ ధాన్యాన్ని చెపూరి మధుకర్ (ఏ4) ద్వారా వివిధ రైస్ మిల్లులకు విక్రయించినట్లు గుర్తించారు.
జిల్లా సివిల్ సప్లై మేనేజర్ ఎస్. నరసింహ ఫిర్యాదు మేరకు కేసు నమోదు చేసి, డీఎస్పీ నాగేంద్రచారి ఆధ్వర్యంలోని ప్రత్యేక బృందం విచారణ చేపట్టింది. ఈ క్రమంలో ఏ1 ఉత్కం విజయ్, ఏ2 కమ్మరి రాజశేఖర్, ఏ4 చెపూరి మధుకర్, ఏ5 వాసాల గణేష్, ఏ6 గాజుల నవీన్‌లను అరెస్ట్ చేసి వారి వద్ద నుంచి మొబైల్ ఫోన్లు, సంబంధిత పత్రాలు, రూ.14.16 లక్షల నగదు స్వాధీనం చేసుకున్నారు. అదనంగా రూ.46.21 లక్షలను వారి బ్యాంకు ఖాతాల్లో ఫ్రీజ్ చేసి నిందితులను రిమాండ్‌కు తరలించారు.
ఈ కేసులో మరింత దర్యాప్తు కొనసాగుతోందని జిల్లా ఎస్పీ తెలిపారు.

జగిత్యాల జూన్ 14 (ప్రజా మంటలు):

(చుక్క గంగారెడ్డి, సీనియర్ జర్నలిస్ట్) 

జగిత్యాల జిల్లా మెట్‌పల్లి తహసీల్దార్ సంతకాన్ని ఫోర్జరీ చేసి, నకిలీ ముద్రలతో తప్పుడు పత్రాలు సృష్టించిన కేసులో రాజుల దేవి నర్సయ్య, కలికోట వేణు, లోలపు గణేష్, పాకాల రాకేష్‌లను మెట్‌పల్లి పోలీసులు ఆదివారం అరెస్ట్ చేశారు.

జగిత్యాల జిల్లా మెట్ పల్లి పట్టణంలోని ఆరపేట వార్డు శివారులోని సర్వే నెం.191 భూమికి నకిలీ ఆబాది సర్టిఫికేట్ తయారు చేసారు. ఆ నకిలీ పత్రాలతో భూమి రిజిస్ట్రేషన్ చేసినట్లు పోలీసులు గుర్తించారు. నిందితుల వద్ద నుంచి కంప్యూటర్ పరికరాలు, రబ్బరు స్టాంపులను స్వాధీనం చేసుకున్నారు. ఈ కేసులో బెజ్జారపు మధుసూదన్, అంగారి శంకర్ పరారీలో ఉన్నట్లు సమాచారం. ప్రభుత్వ పత్రాలను ఫోర్జరీ చేసే వారిపై కఠిన చర్యలు తీసుకుంటామని పోలీసులు హెచ్చరించారు.

జగిత్యాల, జూన్ 04 (ప్రజా మంటలు):

జగిత్యాల జిల్లా కొడిమ్యాల మండల కేంద్రంలోని అటవీశాఖ కార్యాలయంలో ఫారెస్ట్ రేంజ్ ఆఫీసర్ మొయినుద్దీన్ ₹80 వేల లంచం తీసుకుంటూ అవినీతి నిరోధక శాఖ (ఏసీబీ) అధికారులకు రెడ్ హ్యాండెడ్‌గా పట్టుబడ్డారు.

ఉమ్మడి కరీంనగర్ జిల్లా ఏసీబీ డీఎస్పీ విజయ్ కుమార్ నేతృత్వంలో గురువారం ఈ దాడి నిర్వహించారు.

ఏసీబీ అధికారులు తెలిపిన వివరాల ప్రకారం, ఒక వ్యక్తి అధికారిక పని నిమిత్తం ఫారెస్ట్ రేంజ్ ఆఫీసర్ మొయినుద్దీన్‌ను సంప్రదించగా, పని చేయడానికి ₹80 వేల లంచం డిమాండ్ చేసినట్లు ఆరోపణలు ఉన్నాయి. లంచం ఇవ్వడానికి ఇష్టపడని బాధితుడు ఏసీబీ అధికారులను ఆశ్రయించి ఫిర్యాదు చేశాడు.

ఫిర్యాదు ఆధారంగా పక్కా ప్రణాళికతో వల పన్నిన ఏసీబీ అధికారులు, కార్యాలయంలో బాధితుడి నుంచి లంచం స్వీకరిస్తున్న సమయంలో మొయినుద్దీన్‌ను రెడ్ హ్యాండెడ్‌గా పట్టుకున్నారు. అనంతరం కార్యాలయంలో తనిఖీలు నిర్వహించి సంబంధిత రికార్డులు, పత్రాలను స్వాధీనం చేసుకున్నారు.

నాగార్జునసాగర్, జూన్ 4 (ప్రజా మంటలు):

నాగార్జునసాగర్ నియోజకవర్గంలోని నందికొండ మున్సిపల్ అధికారులు పైలాన్ క్రాస్‌రోడ్డు వద్ద ఉన్న తెలంగాణ రక్షణ సేన (టీఆర్ఎస్) జెండా గద్దెను కూల్చివేయడంపై ఆ పార్టీ నాయకులు తీవ్ర ఆగ్రహం వ్యక్తం చేశారు. ఇతర పార్టీల జెండా గద్దెలను వదిలి టీఆర్ఎస్ గద్దెను మాత్రమే తొలగించడం వివక్షపూరిత చర్య అని ఆరోపించారు.
ఈ ఘటనకు నిరసనగా టీఆర్ఎస్ నాయకులు నందికొండ మున్సిపల్ కార్యాలయం ముందు బైఠాయించి ఆందోళన నిర్వహించారు. ప్రభుత్వానికి వ్యతిరేకంగా నినాదాలు చేస్తూ అధికారుల చర్యలను ఖండించారు.
టీఆర్ఎస్ నాయకులు మాట్లాడుతూ, కాంగ్రెస్ నాయకుల ఒత్తిడితోనే మున్సిపల్ అధికారులు ఈ చర్యకు పాల్పడ్డారని ఆరోపించారు. రాష్ట్రవ్యాప్తంగా టీఆర్ఎస్ జెండా పండుగలు నిర్వహిస్తున్నప్పటికీ ఇక్కడ మాత్రమే సమస్య సృష్టించడం వెనుక రాజకీయ కుట్ర ఉందని విమర్శించారు.
మున్సిపల్ కార్యాలయం వద్ద జరిగిన నిరసనలో నల్గొండ జిల్లా టీఆర్ఎస్ ఇన్‌చార్జ్ విక్రాంత్ రెడ్డి, నాగార్జునసాగర్ ఇన్‌చార్జ్ బాలు నాయక్, అబ్జర్వర్ బోడుపల్లి లింగం, దేవరకొండ ఇన్‌చార్జ్ శివ నాయక్, డి. సరిత, బొల్లంపల్లి సందీప్‌తో పాటు పలువురు నాయకులు పాల్గొన్నారు.
ధర్నా సందర్భంగా టీఆర్ఎస్ నాయకులను శాంతింపజేసేందుకు పోలీసులు ప్రయత్నించగా వాగ్వాదం చోటుచేసుకుంది. స్థానిక ఎమ్మెల్యే అనుచరుల ప్రోద్బలంతోనే ఈ ఘటన జరిగిందని ఆరోపించిన నాయకులు, కూల్చివేసిన చోటే మళ్లీ టీఆర్ఎస్ జెండా గద్దెను నిర్మిస్తామని ప్రకటించారు.

గొల్లపల్లి మే 22 (ప్రజా  మంటలు):

జగిత్యాల జిల్లా ఎస్పీ అశోక్ కుమార్  ఆదేశాల మేరకు, డీఎస్పీ పురుషోత్తం రెడ్డి  ధర్మపురి సర్కిల్ రామ్ నరసింహ రెడ్డి  ఆధ్వర్యంలో  ఎస్ఐ, కృష్ణ సాగర్ రెడ్డి పోలీస్ సిబ్బంది ట్రెయిన్డ్ డాగ్ స్క్వాడ్ తో గంజాయి నిషేధిత మాదక ద్రవ్యాల కోసం విస్తృత తనిఖీలు చేపట్టారు. మాదక ద్రవ్యాల నిర్మూలన కోసం ప్రత్యేక చర్యలు చేపట్టారు జిల్లా వ్యాప్తంగా ఏంటి డ్రగ్ & నారకోటిక్ టీం వారు ట్రెయిన్డ్ డాగ్ స్క్వాడ్ సహాయంతో ప్రతి మండలంలోని ప్రధాన ప్రాంతాలలో విస్తృత తనిఖీలు నిర్వహిస్తున్న నేపథ్యంలో, గొల్లపల్లి పట్టణంలోని ప్రధాన కిరాణా దుకాణాలు, టీ స్టాళ్లు, పాన్ షాపులు అనుమానాస్పద ప్రాంతాలలో ప్రత్యేక చెకింగ్ నిర్వహించారు.

 ఈ సందర్భంగా యువతకు  ఎస్ఐ,కృష్ణ సాగర్  రెడ్డి ప్రత్యేక అవగాహన కల్పించారు. గంజాయి వంటి మాదక ద్రవ్యాలు యువత భవిష్యత్తును నాశనం చేస్తాయని, ఆరోగ్యంతో పాటు కుటుంబ మరియు సామాజిక జీవితాలపై తీవ్ర ప్రభావం చూపుతాయని తెలిపారు. అలాంటి నిషేధిత పదార్థాలకు దూరంగా ఉండాలని, ఎవరైనా గంజాయి విక్రయాలు లేదా వినియోగం నిర్వహిస్తున్నట్లు తెలిసిన వెంటనే పోలీసులకు సమాచారం అందించాలని సూచించారు.జిల్లాలో మాదక ద్రవ్యాల నిర్మూలన కోసం ప్రత్యేక నిఘా కొనసాగుతుందని, గంజాయి విక్రయాలు, రవాణా లేదా వినియోగంలో పాల్గొనే వారిపై కఠిన చర్యలు తీసుకుంటామని ఎస్ఐ, కృష్ణ సాగర్ రెడ్డి తెలిపారు

గొల్లపల్లి మే 21 (ప్రజా  మంటలు)

జగిత్యాల జిల్లా ఎస్పీ అశోక్ కుమార్  ఆదేశాల మేరకు, డీఎస్పీ పురుషోత్తం రెడ్డి సూచనలతో, ధర్మపురి సర్కిల్ రామ్ నరసింహ రెడ్డి ఆధ్వర్యంలో  ఎస్సై  మహేష్ పోలీస్ సిబ్బంది ట్రెయిన్డ్ డాగ్ స్క్వాడ్ సహాయంతో గంజాయి నిషేధిత మాదక ద్రవ్యాల కోసం విస్తృత తనిఖీలు చేపట్టారు. జగిత్యాల జిల్లా పోలీస్ శాఖ ఆధ్వర్యంలో మాదక ద్రవ్యాల నిర్మూలన కోసం ప్రత్యేక చర్యలు చేపట్టారు జిల్లా వ్యాప్తంగా ఏంటి డ్రగ్ & నారకోటిక్ టీం వారు ట్రెయిన్డ్ డాగ్ స్క్వాడ్ సహాయంతో ప్రతి మండలంలోని ప్రధాన ప్రాంతాలలో విస్తృత తనిఖీలు నిర్వహిస్తున్న నేపథ్యంలో, ధర్మపురి పట్టణంలోని ప్రధాన కిరాణా దుకాణాలు, టీ స్టాళ్లు, పాన్ షాపులు అనుమానాస్పద.

ప్రాంతాలలో ప్రత్యేక చెకింగ్ లో భాగంగా ఈ సందర్భంగా యువతకు ధర్మపురి ఎస్సై జి. మహేష్  ప్రత్యేక అవగాహన కల్పించారు. గంజాయి వంటి మాదక ద్రవ్యాలు యువత భవిష్యత్తును నాశనం చేస్తాయని, ఆరోగ్యంతో పాటు కుటుంబ మరియు సామాజిక జీవితాలపై తీవ్ర ప్రభావం చూపుతాయని తెలిపారు.

అలాంటి నిషేధిత పదార్థాలకు దూరంగా ఉండాలని, ఎవరైనా గంజాయి విక్రయాలు లేదా వినియోగం నిర్వహిస్తున్నట్లు తెలిసిన వెంటనే పోలీసులకు సమాచారం అందించాలని సూచించారు.జిల్లాలో మాదక ద్రవ్యాల నిర్మూలన కోసం ప్రత్యేక నిఘా కొనసాగుతుందని, గంజాయి విక్రయాలు, రవాణా లేదా వినియోగంలో పాల్గొనే వారిపై కఠిన చర్యలు తీసుకుంటామని పోలీసులు హెచ్చరించారు.

గొల్లపల్లి మే 18 (ప్రజా మంటలు): 

  జగిత్యాల జిల్లా ఎస్పీ శ్రీ అశోక్ కుమార్  ఆదేశాల మేరకు జిల్లా పోలీస్ కళాబృందం ఆధ్వర్యంలో సోమవారం ఎండపల్లి మండలంలోని చర్లపల్లి గ్రామంలో  అవగాహన కార్యక్రమం నిర్వహించారు .

ఈ సందర్భంగా వెల్గటూర్ ఎస్ఐ,ఉదయ్ కుమార్ మాట్లాడుతూ సమాజంలో రోజు రోజుకు పెరుగుతున్న డ్రగ్స్ వినియోగం, సైబర్ నేరాలు, సోషల్ మీడియా ద్వారా జరుగుతున్న మోసాలు, దొంగతనాలు  యువతపై పడుతున్న చెడు ప్రభావాల గురించి ప్రజలకు అవగాహన కల్పించినారు అంతేకాకుండా ప్రస్తుతం కొంతమంది అమాయక ప్రజలు OTPలు, ఫేక్ లింకులు, సోషల్ మీడియా ఫ్రెండ్‌షిప్‌లు, ఆన్‌లైన్ లోన్లు, ఫేక్ జాబ్ ఆఫర్లు వంటి మోసాలకు గురై ఆర్థికంగా నష్టపోతున్నారు అని, అన్నారు.

యువతలో డ్రగ్స్ మరియు చెడు అలవాట్ల ప్రభావం పెరుగుతున్న నేపథ్యంలో వాటి వల్ల కలిగే ప్రమాదాలు, చట్టపరమైన చర్యలు మరియు కుటుంబాలపై పడే ప్రభావం గురించి పోలీస్ కళా బృందం చే  ప్రత్యేక ప్రదర్శనలు, పాటలు సందేశాల ద్వారా అవగాహన కల్పించినారు.

అదేవిధంగా రాత్రి వేళల్లో దొంగతనాల నివారణ, అపరిచితుల పట్ల అప్రమత్తత, మహిళలు విద్యార్థులు తీసుకోవాల్సిన జాగ్రత్తలు, సోషల్ మీడియాను బాధ్యతాయుతంగా వినియోగించాల్సిన అవసరం వంటి అంశాలపై కూడా ప్రజలకు సూచనలు చేశారా ఈ కార్యక్రమం సర్పంచ్, ఉప సర్పంచ్ పోలీస్ కలబందం సిబ్బంది గ్రామస్తులు తదితరులు పాల్గొన్నారు

జగిత్యాల, మే 02 (ప్రజా మంటలు):

జగిత్యాల జిల్లా డీసీపీవో ఎం. హరీష్‌ను సేవల నుంచి శాశ్వతంగా తొలగిస్తూ జిల్లా కలెక్టర్ సత్యప్రసాద్ ఉత్తర్వులు జారీ చేశారు. అధికార దుర్వినియోగం, మహిళా ఉద్యోగులపై వేధింపులు, హాజరు రికార్డుల్లో మార్పులు వంటి ఆరోపణలు ఆయనపై నిర్ధారణ కావడంతో ఈ నిర్ణయం తీసుకున్నారు.
ఈ అంశాలపై గతంలోనే హరీష్‌కు షోకాజ్ నోటీసులు జారీ చేసి హెచ్చరించినప్పటికీ ప్రవర్తనలో మార్పు రాలేదు. అనంతరం అందిన ఫిర్యాదుల మేరకు కంప్లైంట్స్ కమిటీ సమగ్ర విచారణ చేపట్టి ఆరోపణలు నిజమని నిర్ధారించింది. కమిటీ నివేదిక ఆధారంగా కలెక్టర్ ఈ చర్యలు తీసుకున్నారు.
హరీష్‌కు సంబంధించిన బాధ్యతలు, రికార్డులను జిల్లా వెల్ఫేర్ అధికారికి అప్పగించాలని ఆదేశించారు. ఈ ఘటన జిల్లాలో చర్చనీయాంశంగా మారింది.