తెలంగాణ లోని యుక్త వయస్సు వారిలో పెరుగుతున్న ప్యాక్రియాటిక్ క్యాన్సర్

సికింద్రాబాద్, నవంబర్ 14 (ప్రజామంటలు)
:
తెలంగాణలో యువ వయస్సు వారిలో ప్యాంక్రియాటిక్ క్యాన్సర్ కేసులు పెరుగుతున్నట్లు సికింద్రాబాద్ మెడికవర్ ఆసుపత్రి వైద్య నిపుణులు వెల్లడించారు. ఈ నేపథ్యంలో మెడికవర్ హాస్పిటల్స్ ప్రత్యేక ప్యాంక్రియాటిక్ క్లినిక్స్ ను ప్రారంభించినట్లు తెలిపారు. శుక్రవారం ఆసుపత్రిలో ఏర్పాటు చేసిన మీడియా సమావేశంలో వివరాలు వెల్లడించారు.  35–50 ఏళ్ల మధ్య వయోజనుల్లో ఈ సైలెంట్ కిల్లర్ గణనీయంగా పెరుగుతున్నట్టు వైద్యులు ఆందోళన వ్యక్తం చేశారు. లక్షణాలు ఆలస్యంగా కనిపించడం వల్ల రోగులు క్లిష్టమైన చివరి  దశలోనే ఆస్పత్రులను చేరుతున్నారని నిపుణులు పేర్కొన్నారు.

దేశంలో ప్రతి సంవత్సరం 15,000 కేసులు నమోదవుతుండగా, తెలంగాణలో ఈ వ్యాధి పెరుగుదలకు అనారోగ్యకర జీవనశైలి, ఊబకాయం, డయాబెటిస్, ధూమపానం, మద్యం వంటి కారణాలు ప్రధానంగా ఉన్నాయని వైద్యులు తెలిపారు. స్క్రీనింగ్‌, అవగాహన లోపం కూడా పెద్ద సమస్యగా పేర్కొన్నారు. ఈ నేపథ్యంలో మెడికవర్‌లో గ్యాస్ట్రోఎంటరాలజీ, ఆంకాలజీ, హెపటో-ప్యాంక్రియో-బిలియరీ శస్త్రచికిత్స విభాగాలు కలిసి ప్రత్యేక క్లినిక్స్ ను ఏర్పాటు చేశాయి.

డా. కృష్ణగోపాల్ భండారి, డా. సంతోష్ ఎం. నారాయణ్‌కర్, డా. అజయ్ శేషరావు షిండే, డా. పవన్ అడ్డాల తదితరులు ఈ కార్యక్రమంలో కీలక పాత్ర పోషిస్తున్నారు. ప్యాంక్రియాటిక్ క్యాన్సర్ అవగాహన నెల సందర్భంగా వాక్‌థాన్‌, ఉచిత స్క్రీనింగ్ శిబిరాలు, యువ వైద్యుల కోసం శిక్షణ కార్యక్రమాలు కూడా నిర్వహిస్తున్నారు. ఆరంభ దశలో గుర్తింపు మాత్రమే ప్రాణ రక్షక మార్గం అని వైద్యులు సూచించారు.
––