జగిత్యాల రైతు మార్కెట్‌పై ప్రజల ఆందోళన – ట్రాఫిక్ సమస్యలు, అంబులెన్స్ రాకపోకలకు తీవ్ర అంతరాయం

జగిత్యాల (రూరల్) నవంబర్ (ప్రజా మంటలు): 

జగిత్యాల పట్టణంలోని రైతు మార్కెట్‌ వల్ల ప్రతిరోజూ తీవ్ర ఇబ్బందులు ఎదుర్కొంటున్నామని స్థానిక ప్రజలు కలెక్టర్ కార్యాలయానికి ఫిర్యాదు చేశారు. తాజా మాజీ కౌన్సిలర్ హనుమండ్ల జయశ్రీ సమర్పించిన అభ్యర్థనలో, రైతు బజార్‌ను కూరగాయల మార్కెట్‌గా తీర్చిదిద్దిన తర్వాత ప్రారంభంలో ప్రజలు ఆనందపడినా, తగిన విధంగా నిర్వహణ లేకపోవడంతో పరిస్థితి పూర్తిగా ప్రతికూలంగా మారిందని పేర్కొన్నారు.

మార్కెట్‌లో హోల్‌సేల్ వ్యాపారులు మాత్రమే లోపల కూర్చోగా, మిగతా రైతులు రోడ్లమీద వరుసగా కూర్చుని అమ్మకాలు చేస్తుండడం వల్ల రైతు బజారు నుండి రామా థియేటర్ చౌరస్తా వరకు, స్టేడియం రోడ్ వరకు ట్రాఫిక్ పూర్తిగా నిలిచిపోతున్నది. ఈ మార్గంలో అనేక ఆసుపత్రులు ఉండటంతో అంబులెన్స్‌లకు కూడా మార్గం లభించకపోవడం ప్రజల ప్రాణాలను ప్రమాదంలోకి నెడుతోందని పిటిషన్‌లో పేర్కొన్నారు. గతంలో అత్యవసర పరిస్థితిలో ఒక పేషెంట్‌ని తరలించే క్రమంలో అంబులెన్స్ ముందుకు సాగలేక ప్రాణనష్టం జరిగిన విషాద సంఘటనను కూడా జయశ్రీ గుర్తుచేశారు.

అదేవిధంగా, మున్సిపాలిటీ భారీ ఖర్చుతో నిర్మించిన ఫిష్ మార్కెట్, మటన్ మార్కెట్‌లు వినియోగంలోకి రాకపోవడంతో అవి పార్కింగ్ స్థలాలుగా మారి ప్రజా ధనం వృథా అవుతోందని ఆరోపించారు.

మార్కెట్ ఏర్పాటుతో ఆస్తుల విలువలు పెరుగుతాయని భావించిన ప్రాంతీయులు ప్రస్తుతం రోడ్లపై మార్కెట్ విస్తరించడంతో ఆస్తుల ధరలు పడిపోయి అమ్మకానికి కూడా రాని పరిస్థితి ఏర్పడిందని తెలిపారు.

ప్రాంత ప్రజలు వెంటనే చర్యలు తీసుకుని:– రైతులు, వ్యాపారులు అందరూ మార్కెట్ భవనం లోపలే కూర్చునేలా కఠిన చర్యలు

– రోడ్లపై కూరగాయలు, చేపలు, మటన్ విక్రయాలకు పూర్తి నిషేధం

– ఫిష్ మార్కెట్, మటన్ మార్కెట్‌లను పూర్తి వినియోగంలోకి తేవడం, వంటి చర్యలు తీసుకోవాలని అధికారులను కోరుతున్నారు.